Danıal Ahmetov: Bıznestiń paıdasy úshin adamdardyń ómirin qaterge tigýge bolmaıdy
ÓSKEMEN. QazAqparat - Alakól jaǵalaýyn abattandyrýdy ShQO bıligi baqylaýda ustaýda. Búgin oblys ákimi Úrjar aýdanyna saparmen bardy, dep habarlady óńirdiń aqparattyq ortalyǵynan «QazAqparat» HAA tilshisine.
ShQO bıligi Alakólde jumys isteıtin bıznesmenderge bergen ýádesin oryndady. Kóldiń jaǵasyn abattandyrýǵa 500 mıllıon teńge, taǵy 1,5 mıllıard teńge jol jóndeýge bólindi. Jumys qyzyp jatyr. Demalys orny kóz aldymyzda kórkeıip keledi. Alaıda óz ýchaskelerindegi zań buzýshylyqty barlyq kásipkerler joıǵan joq. 147 bazanyń 19-y ǵana barlyq talaptarǵa sáıkes keledi. Qalǵandary taıaý ýaqytta kemshilikterin túzetedi. Al 64 nysanynyń ıegeri jaǵdaıdy jaqsartýǵa áreket jasamaǵan.
Óńir basshysy bıyl bıznesmender zań buzýshylyqty túzetpeıinshe, jumysqa ruqsat almaıtynyn eskertti.
«Demalýshylardyń densaýlyǵyna qaýip ákeletin birde-bir nysanǵa ashylýǵa ruqsat joq. Bul demalys maýsymynda osy jerge keletin 300 myń qonaqty qorǵaý úshin jasalyp otyr», - dedi Danıal Ahmetov. - Bıznesteriń jaqsy júrdi eken dep myńdaǵan adamdardyń ómirin qaýipke tige almaımyz. Buǵan jol berilmeıdi. Ruqsat qujatynsyz bazany ashatyndar bolsa, olar zańmen jaýap beretin bolady.
Kásipkerlerde jumystaryndaǵy qatelikterin túzetýge, týrısterdi qabyldaýǵa bazany daıyndaýǵa áli de ýaqyttary bar.
10 maýsymnan bastap oblys ákiminiń tapsyrmasymen jaǵalaýǵa jumys toby keledi. Onyń quramyna nysan jumysy úshin ruqsaty kerek barlyq vedomstvo ókilderi kiredi. Mamandar bıznesmenderge kómektesip, neni túzetý qajettigin kórsetedi.
