Danıal Ahmetov: Aıagózde úıler qymbattamaıdy dep úmittenemin

Ákimniń aıtýynsha 10 naýryzdan bastalǵan tasqyn kezinde oblys boıynsha 229 úıge sý kirgen. Onyń 189-y Aıagóz qalasyna tıesili. Óskemende 24, Ulan aýdanynda 5, Glýbokoe aýdanynda 8, Zaısan aýdanynda 2, Kúrshim aýdanynda 1 úıge sý kirgen. Sondaı-aq, 193 aýla men 110 saıajaı nysany da sý qursaýynda qalǵan. Qazir barlyq eldi mekender sýdan arylǵan. Jańbyr sýynan japa shekken aýdandardyń qataryna Zyrıan, Katonqaraǵaı, Tarbaǵataı, Shemonaıha aýdandary men Rıdder qalasy da endi.

Al Aıagózdegi baspanasy qulap qalǵan 8 otbasyǵa  birinshi kezekte baspana satyp alynady. Oǵan qajetti qarjy bólinip te qoıǵan. 

«Búgin saǵat 10-ǵa deıin «Aıagóz bolashaq» qoryna oblystyq «Paryz» qorynan 50 mln teńge aýdardyq. Bul qarjyǵa halyqtyń qajettiligine qaraı kómir, qurylys materıaldary, kıim-keshek alynady. Úıi qulaǵan 8 otbasyǵa dereý úı satyp alyp beremiz. Osy sózimnen keıin Aıagózde úı baǵasy qymbattamaıdy dep úmittenemin. Eki kún buryn munda 15 úı satylady degen aqparat bolǵan. Sol kezde aıtylǵan baǵa ózgermeıdi dep senemin. Qymbattap ketken kúnniń ózinde adamdardy dalada tastap qoımaımyz. Úıleri apattyq jaǵdaıda dep tanylǵan adamdar da baspanasyz qalmaıdy. Aıagózdiń ózinde 60 páterlik turǵyn úı salynyp jatyr. Ol qoldanysqa tek 4 aıdan keıin beriledi. Sondyqtan biz qajetti baspanany ekinshi naryqtan izdeıtin shyǵarmyz», - dedi ol.

Apat kezinde óńirdiń barlyq aýdandarynan 385 adam qaýipsiz jerge kóshirilipti. Aıagózdegi 360 adamnyń 73-i áli de ınternat ǵımaratynda kúneltýde. Onyń 42-si - bala. Danıal Ahmetov eshbir oqýshy sabaqtan qol úzbegenin de aıtty. Óskemende baspanasy turýǵa jaramsyz bolǵan 22 adamnyń jeteýi «Úlbi» áleýmettik qyzmet ortalyǵyna ornalastyrylǵan.

«Keshe Aıagózdiń jaǵdaıymen tanystym. Onyń aldynda Óskemen men Ulan aýdanyndaǵy sý basqan eldi mekenderdi aralaǵanymdy bilesizder. Apat Aıagóz halqyn biriktire túsipti. Eldiń birlik-berekesi qıyn sátte syr bermegenin kórip qýandym. Ázirge jaramsyz bolyp qalǵan úılerdiń sany 18. Bul san áli ósýi múmkin. Oǵan keshe kózim jetti. Biraq aıtarlyqtaı alshaqtyq bolmaýy kerek. Aýdan ákimdigi barynsha tıimdi jumys istep, shıraqtyq tanytqanyn da aıta ketý kerek», - dedi ákim.

Onyń aıtýynsha Aıagózdegi jaǵdaı qaıtalanbas úshin oblystaǵy jaǵdaıdy mamandar áýeden baqylap, monıtorıng júrgizbek. Qazirdiń ózinde 6 tikushaq kóterilip, sát saıyn aqparattardy jedel shtabtyń aldyna túsirýde.

«Aıagózde sý shaıǵan kópirdi jańalaımyz. Jalpy bıyl qalanyń ınfraqurylymyn retteýge 4 mlrd teńge bólingen. Endi jobalardy qaıta qarap, tasqynnan qorǵaný, aryq-bóget júıesin bekemdeý sharalaryn qolǵa alamyz.  Mamandardyń aıtýynsha mundaı jaǵdaı Aıagózde sońǵy 50 jylda bolmaǵan eken. Úıin sý shaıyp ketken adamdarmen de sóılestim. Eń bastysy olardyń erteńge degen senimi joǵalmapty. Ol senimdi aqtaımyz da», - dedi Danıal Ahmetov.

Ulan aýdanynyń Mamaı batyr aýylyna da jańa kópir salynatyny rastaldy.

«Burynǵy kópirdiń asty temir, beti aǵash bolatyn. Onyń ornyna temir-beton materıaldan eni áldeqaıda keń jańa kópir salamyz. Qazir onda da qatynas qalpyna keltirildi», - dedi aımaq basshysy.

Sóz sońynda Danıal Ahmetov bar kináni tabıǵatqa artyp, qol qýsyryp otyra berýge bolmaıtynyn eskertti.

«Mysaly Óskemen qalasynyń Sátpaev dańǵylyndaǵy jalǵyz oıyqpen qala bıligi 8 saǵat boıy áýrelendi. Sý jaıylǵan kúni-aq qosymsha qıyrshyq tastar daıyndap oıylǵan jerlerdi biteı qoıý kerek bolǵan. Al qala ákimi onyń ornyna qozǵalysty toqtatqan. Sý alǵan úılerge de kómek durys uıymdastyrylmaǵan. Dabyl jetken sátte-aq ár úıge 10-15 maman jiberý kerek edi. Bul jerde tabıǵat emes, ózimiz jaǵdaıdy qıyndatqanbyz. Tájirıbesiz basshylarǵa barlyǵyn eskertip otyrmaǵan meniń de kinám bar shyǵar», - dedi Danıal Ahmetov.

Sınoptıkter aptanyń sońyna qaraı taǵy da kún kúrt jylynyp, jańbyr kúsheıedi degen boljam aıtýda. Apat qaıtalansa, tótenshe jaǵdaı qyzmetiniń jeke quramynan bólek 500-den astam áskerı qyzmetker de kómekke kelýge ázir kórinedi.