Danıal Ahmetov: «Altaı» VK qyzdary – bolashaq Olımpıada chempıondary
ASTANA. QazAqparat - Shyǵys Qazaqstan oblysynyń ákimi Danıal Ahmetov óz óńirinde sport salasynda qandaı jumystar atqarylyp jatqanyn aıtyp berdi, dep habarlaıdy QazAqparat tilshisi.
«Birinshiden, búgingi tańda bizdiń voleıboldan qyzdar quramasy álemniń klýbtyq chempıonatynda óner kórsetedi. Álbette, ázirge biz onda jeńimpaz atanbasaq ta, aldaǵy ýaqytta komanda ózin kórsetetinin bilip otyrmyn. Olar - Olımpıadaǵa baratyn bolashaq Olımpıada chempıondary. Qaı ýaqytta qazaq voleıboly ondaı dárejede boldy? Ekinshiden, biz kásibı «Altaı» klýbyn qurdyq. Tabysqa jetý úshin eńbektený kerektigin bilemiz. Birneshe sportshymyz alys elderden kelip jatyr», - dedi Danıal Ahmetov OKQ-da ótken baspasóz máslıhatynda.
Aımaq basshysy óz sózinde oblys namysyn qorǵap júrgen tórt kenııalyq atlet Qazaqstan azamattyǵyn alyp, bizdiń eldiń atynan óner kórseter degen úmitin de jasyrǵan joq.
«Semeıde 24 jastaǵy Gúljanar esimdi marafonshymyz bar. Tek myqty sportshylardyń janynda keleshektegi jeńiske jol salynary anyq. Bizde birneshe aı buryn úrjarlyq jigit dzıýdodan álem birinshiliginiń kúmis júldegeri atandy. Semeı qalasynda kúresten mamandandyrylǵan ortalyq ashtyq. Ondaǵydaı tórt birdeı kúres kilemi Qazaqstannyń birde-bir jerinde joq. Onda 200 bala tálim alyp jatyr, olar arnaıy pansıonatta turady. Óskemende de sondaı ortalyq bar. Sondyqtan, men keleshekte sporttan ıgi jetistikter bolar dep úmittenemin», - dedi Danıal Ahmetov.
