Danıal Ahmetov Altaı aýdanyndaǵy aýrýhanalardyń jumysymen tanysty
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Altaı aýdanyna jumys saparymen baryp, jergilikti medıtsınalyq mekemelerdi aralap qaıtty, dep habarlaıdy QazAqparat.
Aımaq basshysy jańa kardıologııalyq ortalyqtyń qurylys jumystarymen tanysyp, Grehovo aýylyndaǵy ońaltý ortalyǵyna bas suqty.
Ótken jyly Altaıdaǵy aýdanaralyq aýrýhananyń perzenthanasyna kúrdeli jóndeý júrgizilgen bolatyn. Budan bólek, perzenthanany aımaqtandyrýdyń 3-shi deńgeıine aýystyrý aıasynda medıtsınalyq jabdyqtardyń 31 túri satyp alynǵan. Danıal Ahmetov sol jerdegi analarmen sóılesip, sábılerdiń densaýlyǵy men kórsetilip jatqan medıtsınalyq qyzmetterdiń sapasy týraly surady.
«Analar bosaný úshin Marqakólden Óskemenge nemese Úrjardan Semeıge sabylmaýy tıis. Ózi turyp jatqan aýdanda barlyq jaǵdaı jasalý kerek. Sondyqtan biz perzenthanalardy ekinshi deńgeıge kóteretin bolamyz», - dedi ákim.
Byltyr perzenthananyń 5 qyzmetkeri jetekshi sheteldik klınıkalarda, Semeı memlekettik medıtsına ýnıversıtetinde, Nur-sultan men Almaty qalalaryndaǵy ǵylymı ortalyqtarda biliktiligin arttyrdy.
«Aq halattylardy oqytýdy jalǵastyramyz. Árıne Lıtva eliniń medıtsınasy jaqsy damyǵan. Alaıda bunymen toqtap qalmaımyz. Bul sala boıynsha Germanııa men Anglııa eń ozyq memleketterdiń qatarynda. Mine, sol jaqqa dárigerlerimizdi oqýǵa jiberemiz», - dedi Danıal Ahmetov.
Aıta keteıik, 2019 jyly aýdanaralyq aýrýhanaǵa 6 jas maman kelgen: 2 - akýsher-gınekolog, 2 - hırýrg, 1 - anestezıolog, 1 - travmatolog.
Grehovo aýylyndaǵy ońaltý ortalyǵynda emdelýshilerdiń jasyna jáne densaýlyq jaǵdaıyna sáıkes arnaıy áleýmettik qyzmetter kórsetilýde. 80 tósek-orny bar ortalyqta 1 aıdan 6 aıǵa deıin jatýǵa bolady.
