Danıal Ahmetov: Ákimder eldi mekenderdegi máselelerdi jasyrmaýy tıis

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov qala jáne aýdan ákimderine eldi mekenderdegi túrli máselelerdi jasyrmaı, onyń sheshý jolyn izdeý qajettigin aıtty, dep habarlaıdy QazAqparat tilshisi.

Osy jyldyń sáýir aıyna deıin oblystaǵy árbir eldi mekenge basqarma basshylary, ShQO ákiminiń orynbasarlary jáne qalalar men aýdandar ákimderi qatarynan kýratorlar bekitiletin bolady. Aımaq basshysy Danıal Ahmetovtiń aıtýynsha, olar aýyldarǵa baryp, turǵyndardyń ózekti máselelerin tyńdaıdy.

«Aldaǵy úsh jylǵa kýratorlar taǵaıyndalyp, olar jekelegen eldi mekenderdi damytýdyń naqty josparyn ázirleýi tıis. Ákimder máselelerden qashpaı, jasyrmaı, olardyń baryn moıyndap, sheshý joldaryn izdeý qajet. Atap aıtqanda, keıbir eldi mekenderdi turaqty ınternetpen qamtamasyz etý máselesi ózekti kúıinde qalyp otyr», - dedi ol ákimdikte ótken jınalysta.

Osy rette, Danıal Ahmetov energetıka jáne turǵyn úı-kommýnaldyq sharýashylyq, tsıfrlandyrý basqarmalarynyń basshylaryna jaǵdaıdy taldap, ony sheshý joldaryn qarastyrýdy tapsyrdy. Qajet bolsa, qosymsha antennalar men munaralar jetkizilmek.