Danıal Ahmetov 8-synyp oqýshysynyń ІT-jobasyna qarjy bólýge ýáde etti
ÓSKEMEN. QazAqparat – Shyǵys Qazaqstan oblysy Glýbokoe aýdanynda 4 metrlik «Golografııalyq pıramıda» boı kóteredi, dep habarlaıdy QazAqparat.
Oblys ákimi Danıal Ahmetov Glýbokoe aýdanyna jasaǵan jumys sapary barysynda Oqýshylar shyǵarmashylyq saraıyndaǵy IT-kórmege qatysty. Óńir basshysy jas ónertapqyshtardyń eńbekterin joǵary baǵalap, onyń ishinde úzdik dep tanylǵandardy iske asyrýdy usyndy. Atap aıtqanda, 8-synyp oqýshysy Kamılla Safınanyń «Golografııalyq pıramıda» jobasy endi aýdan ortalyǵynda tórt metrlik bıiktikte paıda bolmaq. Bul arqyly barlyq sıpaty bar úsh ólshemdi nysannyń naqty kóshirmesin alýǵa bolady. Jobanyń negizgi artyqshylyǵy – 360 gradýsqa deıin sholý jasaýynda bolyp otyr.
«Mundaı jobany keń aýqymda jasap, jańadan salynyp jatqan Mádenıet úıiniń aldyna qoıý kerek. Balalar Start-up jobasyn ázirlesin, al biz bul úshin tıisti qarajat bólemiz», - dedi Danıal Ahmetov.
Kamılla bul jobany iske asyrý tek IT-synyptardyń ashylýy nátıjesinde ǵana múmkin bolǵanyn atap ótti. Aıta ketsek, búginde Shyǵys Qazaqstan oblysy barlyq mektepterde tórt baǵyt boıynsha sandyq kabınetter ashylǵan jalǵyz óńir.
«Tegin IT-synyptar» partııalyq jobasyn iske asyrý maqsatynda tek Glýbokoe aýdanynda 147 IT-synyp ashyldy. Onda 2230 oqýshy robototehnıka, baǵdarlamalaý jáne 3D-modeldeý baǵyttary boıynsha oqýda. IT baǵytynda bilim alyp jatqan balalarmen kezdesý barysynda olardyń joǵary qyzyǵýshylyqtaryn kórdim. Sondyqtan bıylǵy jyly 1 qyrkúıekke deıin oblystyń ІT – baǵdarlamalaýdy oqytý baǵdarlamasy álemdik standartqa sáıkestendiriletin bolady. Bul basty mindet», - dedi Danıal Ahmetov.
