Danelııa Týleshova qazaqsha jańa án shyrqady
Jas ánshi saxnaǵa perishte keıpinde shyqty. Al onyń beıbit ómirge úndegen áni qarý-jaraq kórmesine jınalǵan jurttyń júregin eljiretti.
«Elin bastaǵan dana Elbasy,
Baıraǵym bıik kókte samǵasyn,
Ár elde beıbit ómir ornasyn,
Álemde soǵys bolmasyn.
Árqashanda aman bolsyn bizdiń álem,
Jerim, dalam, ákeshim, anashym jáne men,
Aıalap-áldılegen aman bolsyn álem!», - dep shyrqady Danelııa Týleshova.
Uıymdastyrýshylardyń aıtýynsha, Danelııanyń búgingi áni arnaıy KADEX-2018 kórmesiniń ashylýyna arnap jazyldy.
«Iá, bul - jańa án. Ony qarý-jaraq kórmesine arnap jazyp berdi. Sózin Oljas Qasym, al mýzykasyn Rınat Ábdihalyqov jazdy. Danelııanyń ózi Shveıtsarııada oqýda boldy. Jańa ándi birkúnniń ishinde jattap aldy», - dedi Danelııa Týleshovanyń ustazy Natalıa Chýrakova QazAqparat tilshisine bergen suhbatynda.
Aıta keteıik, búgin Astanadaǵy halyqaralyq áýejaıdyń áskerı sektory aýmaǵynda V halyqaralyq «KADEX-2018» qarý-jaraq jáne áskerı-tehnıkalyq múlik kórmesi ashyldy. Kórmeniń ashylý rásimine Elbasy Nursultan Nazarbaev qatysty. Bul kórme 2010 jyldan beri ótkizilip keledi jáne osy ýaqyt aralyǵynda qorǵanys ónerkásibi ónimderin óndirýshiler men tutynýshylar arasynda ózara ońtaıly baılanysty ornatý men damytýǵa qolaıly jaǵdaı jasaýǵa, qorǵanys kúshterin tehnologııalyq turǵyda jańǵyrtý máseleleri jóninde tájirıbe almasý úshin tıimdi alańǵa aınaldy. Bıyl kórmede 10 pavılon jumys isteıdi, olardyń ishinen: Túrkııa, Qytaı jáne Reseıdiń 3 jeke pavılony, qazaqstandyq «Qazaqstan ınjınırıng» UK» AQ, «Qazaqstan Paramaýnt ınjınırıng» JShS, «Qaztehnologııa» AQ kásiporyndarynyń pavılondary, odan bólek kosmonavtıka salasynyń jetekshi úlgileri usynylatyn ǵarysh qyzmetine arnalǵan pavılon alǵash ret qoıylyp otyr.
Budan bólek, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, Nıderlandy, AQSh, Serbııa sııaqty álemniń 28 eliniń 318 kásiporny óz ónimderin usynady.
Kórme aıasynda «Qazaqstandaǵy ǵarysh kúnderi» halyqaralyq forýmy, «Cyber and Digital Security» jáne «Advanced Def Tech» konferentsııalary ótedi.
Atalǵan sharalar barysynda álemniń túrli elderinen kelgen mamandar men sarapshylar qorǵanys ónerkásibi, áskerı-tehnıkalyq yntymaqtastyq, ǵarysh qyzmeti men aqparattyq qaýipsizdiktiń mańyzdy máseleleri tóńireginde pikir almasyp, zamanaýı kezeńdegi kıberqorǵanys jónindegi saýaldardy talqylaıdy.
«KADEX-2018» kórmesi 26 mamyrǵa deıin jalǵasady.
