Danelııa Týleshova Almatyda alǵashqy jeke kontsertin ótkizdi
ALMATY. QazAqparat - 11 jastaǵy tanymal ánshi jankúıerlerine «Danelııa jáne dostary» atty shoý tartý etti, dep habarlaıdy QazAqparat tilshisi.
Jas ánshi óziniń alǵashqy kontsertin Almatydaǵy saýda oıyn-saýyq ortalyǵynyń birindegi amfıteatrda ótkizdi. Bul keshte ánshi 10-ǵa jýyq shyǵarma oryndady. Onyń ishinde «Golos.Ditı» jobasynyń jáne avtorlyq ánder bar jáne kaver nusqalar da shyrqaldy.
Jaýyp turǵan nóserge qaramastan jankúıerler súıikti ánshisimen qosyla án saldy. Danelııanyń ásem daýsy, onymen úndesken bı ansambliniń óneri keshtiń kórkin qyzdyryp, jankúıerlerin erekshe kóńil kúıge bólegeni baıqaldy.
Danelııanyń aıtýynsha, oqý jylynyń sońyndaǵy emtıhandarǵa baılanysty, jeke kontsertine az ýaqyt qana daıyndalǵan.
«Men óte qýanyshtymyn! Meni umytpaı, qoldap kelgenderińiz úshin rızamyn! Eseıgende óz kontsertimdi úlken stadıondarda ótkizip, oǵan Dıma Monatik, Beıonse, Dımash Qudaıbergen, Djenıfer Lopes syndy ánshilerdi shaqyrǵym keledi», - dedi armanymen bólisken ánshi. Aldaǵy ýaqytta Danelııa Aqtóbe qalasyna án saparymen attanady. Ol jerde jas ánshi jas vokalıster konkýrsynda arnaıy qonaq retinde qatysyp, án aıtatyn bolady.
Araılym JOLDASBAI
Foto: Alekseı Koterev
