Danelııa Tóleshova týǵan tilinde án aıtýdy qalaıdy
Ánshiniń anasy Elena Tóleshovanyń aıtýynsha, Danelııanyń ustazy Natalıa Aleksandrovna jas ánshiniń repertýaryna jete kóńil bóledi. Zaman talabyna saı shyǵarmalardy tańdaýǵa tyrysady. "Biz týǵan tilimizde ánderdi jazyp alýdy josparlap júrmiz. Biraq bizben jumys isteıtin avtorlardy taba almaı jatyrmyz. Týǵan tilimizde án jazyp alý qajet. Ondaı adamdar tabylady dep oılaımyn", - deıdi E.Tóleshova.
Onyń sózine qaraǵanda, jańa ánderdi jazyp beretin avtorlar tabylsa, quba-qup. "Qazir bizdiń repertýarymyzda tek orys tilindegi ánder ǵana bar. Bizdiń ustazymyz Natalıa Aleksandrovna Danelııanyń ánderin óte muqııat tańdaıdy. Shyǵarmalardyń mýzykasy da, ándi oryndaý máneri de zaman talabyna saı bolsa eken dep tileıdi. Sol sebepti ol kisige unasa, biz mindetti túrde ol ándi oryndaıtyn bolamyz", - dep atap kórsetti Elena Tóleshova.
Aıta keteıik , búgin Danelııa QR Mádenıet jáne sport mınıstri Arystanbek Muxamedıulymen kezdesti. Mınıstr jas ánshige óz quttyqtaýyn jetkizip, mını-aıpad syılady. Sol jerde Danelııa aldaǵy jospary jaıynda habardar etti.
Taıaýda ǵana 10 jastaǵy almatylyq ánshi Danelııa Tóleshova Ýkraınada ótken «Golos. Ditı» shoýynda jeńiske jetken bolatyn. Alǵashqy kezeńde ol "Stone Cold" ánin oryndap, barlyq qazylar alqasyna ózine qaratty. Danelııa osy ánin Youtube jelisinde 8 mln-ǵa jýyq adam kórdi.
Al fınalda «Ne tvoıa voına» atty kompozıtsııany oryndap, kópshilikti tánti etti. Arnaıy ataqpen birge Danelııa Tóleshovaǵa Disneyland Paris-de saıahattaýǵa joldama berildi.