Danelııa Tóleshova men Erjan Maksım elordada óner kórsetedi

NUR-SULTAN. QazAqparat - Qazaqstandyq jas ánshiler Erjan Maksım men Danelııa Tóleshova erteń elordada ótetin QHA HHVІІ Sessııasyna arnalǵan «Týǵan jerge taǵzym» atty kontsertte án shyrqaıdy. Bul týraly Mádenıet jáne sport mınıstri Arystanbek Muhamedıuly Feısbýk paraqshasynda jazdy, dep habarlaıdy QazAqparat.

«Erteń Beıbitshilik jáne kelisim Saraıynda (elordadaǵy - avt.) Qazaqstan halqy Assambleıasynyń HHVІІ Sessııasyna arnalǵan «Týǵan jerge taǵzym» atty kontsert bolady. Kontsert «Qazaqstan - bizdiń ortaq úıimiz» horeografııalyq kompozıtsııamen bastalady. Oǵan «Saltanat» Memlekettik bı ansambli, «Rýhsara» bı ansambli solısteri, Q. Qojamıarov atyndaǵy Memlekettik respýblıkalyq akademııalyq uıǵyr mýzykalyq komedııa teatry, Memlekettik respýblıkalyq akademııalyq koreı mýzykalyq komedııa teatry, «Naz» Memlekettik bı teatry, «Máńgilik» bı teatry jáne Sheshen-ıngýsh etnomádenı birlestiginiń «Vaınah» ansambli qatysady», - deıdi mınıstr.

Arystanbek Muhamedıulynyń habarlaýynsha, baǵdarlamada óte qyzyqty, kóz tartar nómirler jeterlik.

«Al men qazir barsha jurttyń nazaryna ilingen ártis týraly aıtqym keledi. Erjan Maksım jaqynda ǵana Reseıden oraldy, ol «Golos. Detı'2019» konkýrsyna qatysqan bolatyn. Birinshi arna daýys berý nátıjesin qaıta qaraýdy usynǵany belgili. Ol resmı nátıje qandaı bolsa da, biz úshin Erjan - eń úzdik ánshi. Suraqtardyń aldyn ala aıtaıyn: onyń osy kontsertke qatysýy buryn josparlanyp qoıǵan. Erjan Magomaev pen Kozlovskııdiń «Sınıaıa vechnost» kompozıtsııasyn oryndaıdy», - deıdi ol.

Mınıstr Erjanmen birge bir sahnada «Golos. Detı'2018» ýkraın teleshoýy jeńimpazy, Amerıkada ótken The World's best Búkilálemdik talanttar teleshoýynyń fınalyna qatysqan kishkentaı juldyz Danelııa Tóleshova óner kórsetetinin jetkizdi.

«Ol mundaı án jarystaryna qatysý qanshalyqty qıyn ekenin jaqsy biledi. Erjan ekeýi birden ortaq til taýyp, dostasyp ketti. Osyndaı konkýrstarǵa qatysqan balalarymyz úshin bar yqylasymen jankúıer bolyp júrgen barsha qazaqstandyqtarǵa alǵys aıtamyn. Sizderdiń qoldaýlaryńyz olar úshin óte mańyzdy! Danelııa men Erjannyń alǵystaryn sizderge jetkizip otyrmyn!», - deıdi Arystanbek Muhamedıuly.

Eske sala ketsek, birneshe kún buryn Reseıdiń birinshi arnasynyń «Golos. Detı» konkýrsynyń sýperfınalynda Erjan Maksım án shyrqap, ekinshi oryn ıelengen bolatyn.

Al osydan eki jyl buryn Danelııa Týleshova Ýkraınada ótken «Golos. Ditı» shoýynda jeńiske jetken edi.