Danelııa Tóleshova Qytaıdyń mýzykalyq baıqaýyna qatysa ma

BEIJІŃ. KAZINFORM – Qytaıdyń ınternet-strımıng qyzmeti IQIYI usynǵan «Azııanyń jańa daýysy» mýzykalyq baǵdarlamasynyń anonsyn jarııalady. Vıdeoda qazaqstandyq ánshi Danelııa Tóleshova da bar.

Mýzykalyq baǵdarlama týraly aqparatta bul barlyq Azııany qamtıtyn mýzykalyq baıqaý bolatyny aıtylǵan.

Shoý jospary boıynsha Azııanyń túrli elinen júzdegen jas ánshi krýızdik kemege otyryp, Azııany aralaıdy. Sapar barysynda ánshiler «Azııa ánshisi» ataǵy úshin talasady.

Sapardyń marshrýtyna Japonııa, Taıland, Malaızııa, Sıngapýr jáne Gonkong (Qytaı) kiredi.

Anonsta Azııanyń ártúrli elinen jas ánshiler shaqyrylyp jatqany aıtylady, osy tusta qazaqstandyq ánshi Danelııa Tóleshova da kórsetiledi.

Aıta ketsek, Danelııa Aleksandrovna Tóleshova - «Golos. Detı» (Ýkraına) baǵdarlamasy tórtinshi maýsymynyń jeńimpazy, «Junior Eurovision 2018» án baıqaýynda Qazaqstannyń atynan án aıtyp, 6-oryn alǵan.

Sondaı-aq ánshiniń America' s Got Talent shoýynda óner kórsetkeni týraly jazǵan edik.