Danelııa Tóleshova qazaq tilindegi ánine beınebaıan túsirdi
ALMATY. QazAqparat – Jas ánshi Danelııa Tóleshova qazaq tilindegi «Mama» atty áninebeınebaıan túsirdi, dep habarlaıdy QazAqparat tilshisi.
Ulyqpan Joldasov pen Kamıla Daıyrovanyń áni 21 maýsymda tyńdarmanǵa tanystyrylǵan bolatyn. Beınebaıannyń promorolıgi qysqa ýaqyttyń ishinde júz myńdaǵan qaralym jınap úlgerdi.
«Biz ár tyńdaýshynyń janyn túbirimen qozǵaıtyn án izdedik. «Mama» áni – sol talapqa saı kompozıtsııa. Osyndaı talantty avtorlardyń ánin oryndaýǵa múmkindik bergen taǵdyryma rızamyn. Árıne, klıpti túsirgen kezde kóp eńbektendik. Birneshe ıdeıa boldy. Biraq, janyma jaqyn názik jandylardyń basyn qosatyn nusqa unady. Anam da, ájem de, sińlim Amelı de óz rólderin tamasha oınap shyqty. Nátıjesi ózime unady! Óte áserli jáne ádemi týyndy shyqty», - deıdi ánshiniń ózi.
Sıýjet boıynsha Danelııanyń januıasyndaǵy názik jandylar túrli ýaqyt kezeńinde kórsetilgen. Amelı Tóleshova arǵy ájesiniń balalyq shaǵyn somdap, týǵan aýylynda asyr salyp júredi. Al anasy ony úıde kútip otyrady. Endi birde anasy qyzyn aıalap, qorǵaýshy bolyp árdaıym Danelııanyń janynan tabylady.
«Meniń oıymsha, mundaı sıýjet árkimniń janyna jaqyn tıedi. Anamyz ben ájelerimiz jaıly árqashan jaqsy oılar ǵana oılaımyz. Óıtkeni, olar bolmasa, biz de bolmas edik qoı. Sondyqtan klıp analarǵa, ana beınesine, ana qamqorlyǵyna arnalǵan», - deıdi Danelııa.
Vıdeorolık Almatydaǵy NOMAD etno-ortalyǵy men Medeý shatqalynda túsirilgen. Onyń tanystyrylymyn Gakku mýzykalyq telearnasy men sandyq mýzykalyq platformalarynda 27 tamyzda ótkizý josparlanǵan.
