Danelııa Tóleshova America’s Got Talent shoýynyń kórermenderin tań qaldyrdy
ALMATY. QazAqparat - Qazaqstandyq jas ánshi Danelııa Tóleshova America’s Got Talent baıqaýynda baq synap jatyr, dep habarlaıdy QazAqparat tilshisi.
Danelııa bıylǵy maýsymnyń 3-epızodynda óner kórsetti. Ánshi kanadalyq ónerpaz Faouzia-nyń «Tears of Gold» atty ánin oryndap berdi.
Danelııanyń ónerinen soń búkil zal ornynan turyp, qol soqty.
«Men eń tanymal joba - America’s Got Talent baıqaýynda baq synap jatyrmyn. Menińshe, bul – bar ónerpazdyń armany. Sebebi bul – deńgeıi joǵary baıqaý. Men barlyq synaqta ózimdi barynsha kórsetýge tyrysamyn», - dedi Danelııa.
NBC arnasynda ataqty shoýdyń 15-maýsymy bastaldy. Bul baıqaýdyń qazylar alqasynda America’s Got Talent baıqaýynyń negizin qalaýshy, prodıýser Saımon Koýell, talantty aktrısalar Sofııa Vergara, Haıdı Klým, shoýmen Hoýı Mendel bar.
Telejoba 2006 jyldyń 21 maýsymynan bastap ótip keledi.
Bas júlde - $1 000 000.
