Dándi daqyl alqaptary 285,5 myń gektarǵa qysqarǵan

NUR-SULTAN. QazAqparat – Bıyl kóktemgi egis jumystarynyń qorytyndysy boıynsha dándi daqyl alqaptary 285,5 myń gektarǵa qysqarǵan. QR Aýyl sharýashylyǵy mınıstri Erbol Qarashókeev Úkimet otyrysynda osyndaı derek keltirdi, dep habarlaıdy QazAqparat tilshisi.

«Oblys ákimdikteriniń jedel derekterine sáıkes, 7 maýsymdaǵy jaǵdaı boıynsha egis jumystary Aqtóbe (97,7%) jáne Batys Qazaqstan (86,2%) oblystarynan basqa óńirlerdiń bárinde aıaqtaldy. Atalǵan oblystarda egis jumystary egis kezeńindegi jaýyn-shashynǵa baılanysty sozyldy. Onyń aıaqtalýy osy aptanyń sońy dep josparlanýda», - dedi mınıstr.

Onyń málimeti boıynsha bıyl jazdyq daqyldar 19,8 mln gektar alqapqa nemese belgilengen jospardyń 100,2%-yna, kartop 189,6 myń gektar alqapqa, kókónis-baqsha daqyldary 269,2 myń gektar alqapqa, kópjyldyq shópter 429,6 myń gektar alqapqa egilgen.

«Maıly daqyldar 3,1 mln ga (jospar boıynsha 3 094 myń ga), qant qyzylshasy – 12,3 myń ga (jospar boıynsha 11,1 myń ga), maqta – 121,1 myń ga (jospar boıynsha 114,7 myń ga) egilip sebý jumystary aıaqtaldy.

Jalpy egis alqaby 23,1 mln gektardy qurady. Bul 2021 jyldyń kórsetkishinen 105 myń gektarǵa artyq.

Óndiristi ártaraptandyrýǵa jáne monokýltýradan alshaqtaýǵa sáıkes, dándi daqyldar alqaptary 285,5 myń gektarǵa qysqardy», - dedi Erbol Qarashókeev.

Osylaısha maıly daqyldar 24,9 myń gektarǵa, kartop 2,4 myń gektarǵa, kókónis 1,7 myń gektarǵa jáne jem-shóp daqyldary 448,1 myń gektarǵa ulǵaıǵan. Keıingi jyldar osy atalǵan daqyldardyń tapshylyǵy sezilgen bolatyn.

Mınıstrliktiń boljamy boıynsha, bıyl astyq shyǵymy byltyrǵydan 15 paıyz joǵary bolady.