Dándi-daqyldardy tereń óńdeýdi damytýdyń 5 jyldyq jospary ázirlendi

ASTANA. KAZINFORM — «Qazaqstan Respýblıkasynda dándi-daqyldardy tereń óńdeýdi damytýdyń 2025-2029 jyldarǵa arnalǵan keshendi jospar» ázirlendi. Úkimettiń qaýly jobasy ashyq NQA portalynda jarııalandy. 

Memleket basshysy Qasym-Jomart Toqaev Ulttyq quryltaıdyń tórtinshi otyrysynda qordalanǵan máseleniń bárin sheship, agroónerkásip keshenin jańa deńgeıge kóterý úshin kóp jumys istelip jatqanyn aıtqan edi. 

— Biz aldaǵy bes jylda aýyl sharýashylyǵynyń jalpy ónimin eki ese kóbeıtip, osy saladaǵy eńbek ónimdiligin úsh ese arttyrýymyz kerek. Bul — óte mańyzdy mindet. Qazaqstan 10 jyl ishinde bıdaıdy tereń óńdep, daıyn ónim óndiretin jáne ony álemdik naryqqa shyǵaratyn eń úzdik on eldiń qataryna qosylýǵa tıis, — degen bolatyn Prezıdent.

Joǵaryda atalǵan qujat Memleket basshysynyń osy tapsyrmasyna iske asyrý úshin ázirlengen.

Keshendi jospar iske asqan jaǵdaıda mynadaı nátıjeler kútiledi:

— jyl saıyn keminde 2 jańa joǵary tehnologııalyq óndiristi iske qosý úshin ınvestıtsııalar tartylady;

— 2029 jylǵa qaraı dándi daqyldardy tereń óńdeý ónimderiniń óndiris kólemi 2024 jylmen salystyrǵanda 12 esege ulǵaıtylady;

— 2029 jylǵa qaraı dándi daqyldardy tereń óńdeý ónimderiniń eksportynyń úlesin óńdelgen ónimderdiń jalpy eksport kóleminde 2024 jylmen salystyrǵanda 4 esege arttyrylady. 

Aıta ketelik Qazaqstanda óndiriletin balyq ónimi álemniń 21 eline eksporttalatyny týraly jazǵan edik.