Dándi daqyl egis alqaptarynyń 15,8 mln gektary jınaldy — Úkimet
ASTANA. KAZINFORM — Úkimette egin jınaý naýqany jónindegi jedel shtab otyrysy ótip, jańa ónim kezeńiniń aldyn ala qorytyndylary qaraldy. Bul týraly Úkimettiń baspasóz qyzmeti málim etti.
Málimetterge súıensek, dándi daqyl egis alqaptarynyń 99%-ynda, ıaǵnı 15,8 mln gektarda jınaldy. Sondaı-aq burshaqty daqyldardy jınaý is júzinde aıaqtalyp, 1 mln tonnadan astam rekordtyq kórsetkishke jetti.
Qazirgi ýaqytta júgeri (134 myń ga, 77%), maıly daqyldar (3,5 mln teńge, 74%) jınalyp jatyr, kartop (3 mln teńge), basqa kókónister (3,9 mln teńge) jáne qaýyn-qarbyz daqyldary boıynsha jumys (2,6 mln teńge) tolyǵymen aıaqtaldy.
Tyńaıtqyshtardy der kezinde qosý jáne 2025 jylǵy kóktemgi dala jumystaryna qarjyny erterek bólý joǵary nátıjege qol jetkizýge erekshe yqpal etti.
Egis naýqanyna bólingen 700 mlrd teńgeniń 502 mlrd-y ıgerildi.
Agrarlyq nesıe korporatsııasy arqyly 2026 jylǵy egis naýqanyna jeńildetilgen qarjylandyrýǵa fermerlerden ótinim qabyldaý bastaldy.
Budan bólek, aýyl sharýashylyǵy tehnıkasyn jeńildetilgen lızıngke berý úshin bólingen 250 mlrd teńgege qazirdiń ózinde 253 mlrd teńgeniń ótinimi qabyldandy. Bul 8 myńǵa jýyq aýyl sharýashylyǵy tehnıkasy jańartylady degen sóz.
«Damý» qory arqyly kóktemgi jáne kúzgi dala jumystaryna arnalǵan nesıelerdiń 85%-yna deıingi kepildik berý baǵdarlamasy júzege asyrylýda. Bul kepil bazasy jetkiliksiz sharýalarǵa kóktemgi egis jumystaryna jeńildetilgen nesıe alýǵa múmkindik beredi.
— Búgingi kúni jalpy somasy 196,9 mlrd teńgege 1336 kepildik berildi, al qaryzdardyń jalpy kólemi 231,7 mlrd teńgege jetti, — delingen habarlamada.
Lıtsenzııalanǵan astyq saqtaý qoımalary egin qabyldaý qyzǵan shaqta da qalypty jaǵdaıda jumys atqara beredi, ıaǵnı 5,4 mln tonnasy (40%) toldy, taǵy da 7,8 mln tonnaǵa jeterlik bos oryn bar. Egin jınaý bastalǵaly beri elevatorlarǵa 6,7 mln tonna astyq tapsyryldy, bul ótken jyldyń uqsas kezeńimen salystyrǵanda eki ese kóp (2024 jyly — 3,4 mln tonna).
Jınalǵan astyqtyń 54%-y — úshinshi synypty bıdaı.
Aýyl sharýashylyǵy vıtse-mınıstri Azat Sultanovtyń aıtýynsha, qazan aıynyń alǵashqy onkúndiginen bastap qant zaýyttary jańa ónimniń qyzylshasyn qabyldaýdy bastady.
«Aqsý qant» zaýytynda kólik kezegin boldyrmaý úshin qyzylsha qabyldaýǵa elektrondy kezek júıesi engizildi.
Jalpy Jetisý óńirinde 154 myń tonna qant qyzylshasy jınaldy.
Vıtse-premer Serik Jumanǵarın negizgi astyq óndirýshi óńirlerdiń ákim orynbasarlarynyń egin jınaý barysy týraly esepterin tyńdady.
Aımaqtar jeńildetilgen dızel otynymen tolyq qamtamasyz etilgeni aıtyldy, alaıda astyqty keptirýge arnalǵan kógildir otynnyń jetispeýshiligi baıqalady.
Vıtse-premer astyq qabyldaý protsesin kidirissiz aıaqtaý úshin Energetıka mınıstrligine óńirlerge qosymsha kógildir otyn bólýdi tapsyrdy.