Dana Nurjigit: Erbolat Rınatqa judyryq ala júgirce, ony túsiner edim
ASTANA. QazAqparat - Belgili telejúrgizýshi Dana Nurjigit qoǵamda keń talqyǵa túsip júrgen "91" tobyna qatysty pikirin bildirdi, dep habarlaıdy Baistars.kz.
"Erbolat Bedelxanǵa aıtarym: On jyldan astam tańdaǵan jolynan jańylmady, tabandy eńbek etip, bir kún - kól, bir kún - shól bolatyn násibin búkil tobyna jumsap júrgen Erbolatqa ornymnan turyp qol soǵamyn. Oǵan da kezinde qansha adam lap berip, "myna istep júrgeniń qate" degen edi, ol óziniń maqsatynan bas tartqan joq. Birjaqty qyńyrlyq, stereotıptik sana - damýdyń joly emes. Ásirese ónerde!" - dep jazdy Dana Nurjigit Instagramdaǵy jeke paraqshasynda.
Budan keıin telejúrgizýshi qarsha boraǵan synǵa erekshe sabyrlylyq tanytqan Erbolatty qoldaıtynyn jetkizdi. "Zaıytovtyń "91" tobynyń syrt kelbetin synap, til tıgizip, "jıirkenemin" degen aýyr sózin sabyrmen tyńdap, judyryq ala júgirmeı (ony istese de túsiner edim) mıyǵynan ǵana kúlip qoıyp emotsııaǵa, ashýǵa jol bermeı jaýap berip otyrǵan Erbolat men úshin opponentinen áldeqaıda joǵary, mádenıetti" - deı kele ol osy syn arqyly prodıýser tobyn shyńdap aldy degendi aıtady. "Ol qol astyndaǵy topty osylaısha «sparıngke» shyǵaryp aldy. Synady. "...Shydaısyń ba menimen dostasýǵa, Jalań aıaq sý keship, tas tasýǵa", degen Muqaǵalı aqynsha seriktesterine suraqty tótesinen qoıdy. Shash óser, boıaýy jýylar, trıko shalbar bop ózgerer. Biraq, araq iship, esirtki tartyp esirmegen, ónerde óz jolyn izdep, ósip kele jatqan jastardy osynshama talap, músirketip "men sııaqty kostıým shalbar kımeısiń ba, shashty durystap qysqartpaısyń ba?" - dep jer shuqytyp qoıý, qaz-qaz turyp kele jatqan balaǵa,"nege júgirip ketpeısiń?" degenmen teń" - deıdi telejúrgizýshi.
Budan keıin ol "91" toby sııaqty kórermen bir kezderi "A-stýdıony" da túsinbegenin aıtty. "Konformıster qashan da bolǵan, bola da beredi. Olardy tyńdasaq, elden erek, alystan asaý minezin bildiretin uzyn shash qoıǵan ánshi, aqyndarymyz - Batyrxan, Jarasqandar, Qadirlar qaıda bizge? Konformısterdi tyńdasaq, syǵan qyzy Karmendi operanyń bas keıipkeri etip, kórermenniń yzasyn týdyrǵan Bıze týmas edi. "Jalań aıaq syǵannyń saıqalyn operaǵa arqaý etken darynsyz" degen jaman atqa qalǵan Bıze búgin el aýyzyndaǵy klassık. "Araıdan" ketip, "Alma-Ata stýdıo" bolǵan Serkebaev Baıǵalıdiń ózi mundaıdy bastan ótkergen. AHBK saraıynyń kontsert zalyndaǵy alǵashqy premerasynan xalyq turyp-turyp ketip qalǵan. Túsinbegen. Shashy jalbyraǵan jigitter, maıkisheń turyp án salǵan Batyrxandy bireý eske alsa, sol bizder. Bizdiń urpaq. Aıta berse kóp qoı".
Sondaı-aq Dana Nurjigit synasa namysqa tıip emes, mádenıetti synaýdy usyndy. "Ónerde uqsastyqtan jamany joq! Synasaq "jıirkenemin" degen adamı namysqa tıetin, kóshedegi betjyrtystyń leksıkonyna súıenip emes, konstrýktıvti, mádenıettaný degen ǵylymǵa júginip otyryp dáıekti dálel keltirip otyryp synaıyq!" - dedi Nurjigit.
Aıta keteıik, kúni keshe ǵana "91" toby kópshiliktiń synyna qaramastan taramaıtynyn məlimdegen bolatyn.
