Dán sebilgen sátten bastap, ónim dastarhanǵa kelgenge deıin tsıfrlyq tirkeýde bolady

ASTANA. KAZINFORM — Bul fermerlerdiń jumysyn jeńildetip, janýar týraly málimetterdi naqtylaýǵa múmkindik bermek.  Bul týraly Jibek joly telearnasynyń jańalyqtar qyzmetinde aıtty. 

Al dál osyndaı tsıfrlyq jańǵyrý ósimdik sharýashylyǵynda da qolǵa alynǵan. Qazir arnaıy júıe jasalyp jatyr. Ol arqyly dán sebilgen sátten bastap, daıyn ónim dastarhanǵa kelgenge deıin búkil jol tsıfrlyq tirkeýde bolady.

- Ósimdik sharýashylyǵyn qadaǵalaý júıesin ázirlep jatyrmyz. Onyń negizgi maqsaty azyq-túlik qaýipsizidigin qamtamasyz etý, — deıdi Agroónerkásip keshenindegi ekonomıkalyq saıasatty taldaý ortalyǵynyń jobalyq menedjeri Aıdar Jaqsybaev.

Buryn jer ınspektorlary alqapty jaıaý aralaıtyn. Aqparattyq júıeler bir-birimen baılanyspaǵandyqtan, tekseris uzaqqa sozylyp ketetin. Qazir bul ádis ótkenniń enshisinde.

Búginde 116 mıllıon gektar jer tolyqtaı spýtnıktik baqylaýǵa alynǵan. 2022 jyldan beri 12 mıllıon gektar paıdalanylmaǵan jer memleketke qaıtaryldy. Bıyl jyl sońyna deıin taǵy 2 mıllıon gektar alqap keri qaıtarylmaq. Al jalpy 5 mıllıon gektar jer jergilikti halyqtyń qajetine qaıta bólingen. Endi jer ıeleri eskertý habarlamasyn SMS arqyly alyp, barlyq málimetti jeke kabınetten kóre alady.

- Qazirgi tańda mınıstrlik tarapynan kórsetiletin 79 memlekettik qyzmettiń 77-i onlaın qoljetimdi. Bul ıaǵnı 97%-y, — deıdi Aýyl sharýashylyǵy mınıstrliginiń basqarma basshysy Jaqsylyq Erkinbekuly.

Aıta ketý kerek, qazir el aýmaǵynda 200-den astam tsıfrlyq ferma bar. Olar drondardy, datchıkterdi jáne GPS júıelerin belsendi paıdalanady. Bul naqty ýaqyt rejıminde topyraqtyń, egis alqaptarynyń jaǵdaıyn baqylaýǵa kómektesip, egý, uryqtandyrý jáne sýarý protsesin ońtaılandyrýǵa jol ashady.

- Qazir Tsıfrlyq damý mınıstrligimen fermalarǵa ınternet jetkizý boıynsha birigip jumys jasap jatyrmyz, — deıdi Aýyl sharýashylyǵy mınıstrliginiń basqarma basshysy Jaqsylyq Erkinbekuly.

Jalpy agrosaladaǵy tsıfrlandyrý shyǵyndy qysqartyp, ónimdiliktiń ulǵaıýyna, qyzmet kórsetýdi jedeldetip, ashyqtyqtyń artýyna sep bolmaq. Osylaısha fermer ýaqytyn únemdeıdi, memleket baqylaýdy kúsheıtedi, al qoǵam azyq-túlik qaýipsizdigine senim artady.

Aıta ketelik Qazaqstanda aýyl sharýashylyǵyn tsıfrlandyrý qalaı júrip jatqany týraly jazǵan edik.