Damyǵan óndiristerdi, kóterme saýda nysandary men qoımalardy Almatynyń syrtyna shyǵarý qajet - Memleket basshysy
ASTANA. 12 mamyr. QazAqparat - Qazaqstan Respýblıkasynyń Prezıdenti Nursultan Nazarbaev Úkimetke Almaty jáne Almaty oblystarynyń ákimderimen birlese otyryp, qalanyń jáne qalaǵa jatatyn aýmaqtardyń kóliktik júıesin
damytý jónindegi keshendi jospar daıyndap, ony qabyldaýǵa tapsyrdy, dep habarlaıdy Almatydaǵy keńes qorytyndysy boıynsha Prezıdenttiń baspasóz qyzmeti.
Memleket basshysynyń aıtýynsha, Almaty iri kóliktik-logıstıkalyq shaharǵa aınalýda. «Kún sanap júk jáne jolaýshylar tasymaly artyp keledi. «Jetigen-Qorǵas» temir jolynyń ýchaskesi iske qosylyp, «Batys Qytaı-Batys Eýropa» avtokóligin qaıta qurastyrýdan ótkizgennen keıin kólikter legi budan da artatyn bolady», - dep atap ótti N.Nazarbaev.
«Kún saıyn Almatyǵa 1 mln.-ǵa jýyq kólik quraly, onyń ishinde basqa qalalardan 400 myń kólik keledi. Tańerteńgi jáne keshki kólik keptelisi qaladaǵy ádettegi jaǵdaıǵa aınaldy», - dedi Elbasy.
Nursultan Nazarbaev atap ótkendeı, bul máselege keshendi túrde qarap, osy problemalardy sheship otyrǵan álemdegi iri qalalardyń tájirıbesin jetik ıgerý kerek.
«Shyǵys aınalma jolynyń qurylysyn aıaqtaý mańyzdy másele. Qarjylandyrý bar. Men burynyraq Úlken Almaty dóńgelek avtokólik jolyn 2012 jylǵa deıin salyp bitirýdi tapsyrǵanmyn. Qurylys áli bastalǵan joq. Men kólik jáne komýnıkatsııa mınıstrligine múddeli memlekttik organdarmen birlese otyryp, osy máseleni qaraýdy jáne tısti sheshim qabyldaýdy tapsyramyn», - dep atap ótti N.Nazarbaev.
Memleket basshysy kóptegen adamdar qalaǵa jaqyn aýdandardan jumys isteý úshin Almatyǵa kelerde ýaqytynyń basym bóligin joǵaltatyndyǵyn aıtyp ótti. Sondyqtan: «Qaskeleń, Qapshaǵaı jáne Esikke deıingi qala mańyndaǵy qoǵamdyq kólikterdiń jyldamdyǵyn arttyrý boıynsha bilek sybana jumysqa aralasý kerek», - dep habarlaıdy Prezıdenttiń baspasóz qyzmeti.
Memleket basshysy atap ótkendeı, bazarlardyń qala ishinde ornalasýy qaladaǵy kólik qozǵalysyna kedergi keltiredi. Óndiristerdi, logıstıka, kóterme saýda nysandary men qoımalardy qala syrtyna shyǵarý kerek.
