Damyǵan memleketter de koronavırýstyń enýinen qorǵanysqa tolyq kepildik bere almaıdy - QR Prezıdenti
NUR-SULTAN. QazAqparat - Damyǵan memleketter de koronavırýstyń enýinen qorǵanysqa tolyq kepildik bere almaıdy. Bul týraly Qazaqstan Prezıdenti Qasym-Jomart Toqaev informburo.kz aqparattyq-saraptamalyq portalyna bergen eksklıýzıvti suhbatynda aıtty, dep habarlaıdy QazAqparat tilshisi.
«Biz jaǵdaıdy baqylaýda ustaýǵa tyrysamyz. Ókinishke oraı, eshkim, tipti damyǵan memleketter de vırýstyń enýinen qorǵanysqa tolyq kepildik bere almaıdy. Degenmen, der ýaqytynda qabyldanǵan sharalar oń nátıjesin berip otyr. Búgingi kúngi jaǵdaıǵa sáıkes, Qazaqstanda juqtyrý oqıǵalary tirkelgen joq. Úkimetke azamattardyń densaýlyǵyn qorǵaý úshin eń batyl, jan-jaqty sharalar qabyldaý tapsyryldy. Asyra siltemeı ári dúrbeleńsiz», - dedi QR Prezıdenti.
Memleket basshysynyń aıtýynsha, koronavırýs álem boıynsha óte joǵary jyldamdyqpen ári qaýipti aýqymda taralyp jatyr. Sondyqtan bul da eskerilýde.
«Eger tendentsııa osy qalpynda qalatyn bolsa, onda kóp adamdar qatysatyn sharalardy, onyń ishinde halyqaralyq forýmdardy basqa ýaqytqa aýystyrýǵa nemese boldyrmaýǵa týra keledi. Tarıh indettiń bılik pen azamattardyń batyl áreketterinen «qaýiptenetindigin« kórsetip otyr», - dedi Qasym-Jomart Toqaev.
