Damyǵan elderde jemqorlyqtyń ıisin de sezbeısiz - Alık Shpekbaev
«Polıtsııa qyzmetkerleriniń aılyǵy 150 myń teńgeden 320 myń teńgege deıin ósetini jaqynda habarlandy. Maksımaldy 320 myń teńge degen - óte qomaqty jalaqy. Barlyq qurylymdarda da osyndaı laıyqty eńbekaqy bolýy kerek dep esepteımin. Sebebi, barlyq jemqorlyq jaǵdaıynyń negizgi sebebi de osymen tikeleı baılanysty. Sonymen qatar, tártip saqshylarynyń áleýmettik máseleleri de sheshiletinin atap ótý kerek. Áleýmettik paket keńeıip keledi. Turǵyn úımen qamtý, ıpotekalyq nesıeleý sekildi sharalarda jeńildik bolady», - dedi Alık Shpekbaev ІІM-de qoǵamdyq uıymdardyń, ishki ister organdarynyń ókilderimen kezdesýde.
Onyń aıtýynsha, jaǵdaı jasalyp jatqandyqtan, elge adal qyzmet etý - polıtsııa qyzmetkeriniń negizgi tilegine aınalýy kerek.
«Paradan bas tartý jigeri men elge qyzmet etý tileginen aınymaý kerek. Eń bastysy, etıka men adaldyq, adamdyq qalýy tıis. Damyǵan elderdiń kóbinde qazirgi tańda jemqorlyqqa qarsy zań da joq. Kóbińiz shetelde bolǵan shyǵarsyzdar. Barlyq jerde etıkany ustanady. Durys túsinýlerińizdi suraımyn. Mine, kezeń-kezeńimen biz de osy standarttarǵa ótýimiz kerek. Olar tipti «jemqorlyq» degen sózdi kóptiń aldynda aıtýǵa uıalady. «Ol sózdi bizde aıtý orynsyz» degendi de estidik. Ol jaqta jemqorlyqtyń ıisin de sezbeısiz. Sol sebepti, búgingi qujat - alǵa jyljýda serpin beredi degen senimdemin», - deıdi Alık Shpekbaev.
Aıta ketsek, búgin elordada ІІM men Memlekettik qyzmet isteri jáne sybaılas jemqorlyqqa qarsy is-qımyl agenttigi basshylyǵy azamattyq qoǵam jáne BAQ ókilderimen kezdesý ótkizdi. Kezdesýde ishki ister mınıstrliginiń Jol kartasy negizinde qoǵamdastyq jáne vedomstvolar ázirlegen ishki ister organdaryndaǵy jemqorlyqpen kúrestiń úshjaqty jospary tanystyryldy.
«Reforma baǵdarlamasyn ázirleýde belsendi túrde atsalysyp júrgen azamattarǵa erekshe alǵysymdy aıtqym keledi. ІІM Sizdermen árdaıym birlese eńbek etýge daıyn. ІІM tek synnyń astynda qalatyn organ emes, senimge ıe bolǵanyn qalaımyz», - dedi ishki ister mınıstri Erlan Turǵymbaev.