Damyǵan 30 eldiń qataryna kiremiz desek JІÓ 5 paıyzdan kem bolmaýy tıis - QR Prezıdenti
ASTANA. QazAqparat - Damyǵan 30 eldiń qataryna kiremiz desek jyldyq jalpy ishki ónimimiz 5 paıyzdan kem bolmaýy tıis. Bul týraly búgin Úkimettiń keńeıtilgen májilisinde QR Prezıdenti Nursultan Nazarbaev aıtty, dep habarlaıdy QazAqparat.
«Úshinshi jańǵyrý órkendegen, ósken 30 eldiń ishine ený úshin jasalyp otyrǵan taǵy bir shara. Bul jumys burynǵy jumystardan qıyn, kúrdeli. Barlyqtaryńyz oılanýlaryńyz kerek. Mınıstrlerdi, Úkimet basshysyn, oblys ákimderin tyńdap otyrǵanda ishimnen bıylǵy jyl byltyrǵydan jaqsy bolady, dep oılap otyrdym. Birinshiden bazasy tómen, ekinshiden jaǵdaı túzelip keledi. Baǵa metalǵa da, munaıǵa da, gazǵa da, barlyq salalarda da ósip kele jatyr. Biz munaı men gazdyń tómen baǵasyna úırendik. Buǵan ekonomıka beıimdeldi desek te bolady. Bir jaǵynan osy bolýy da kerek edi. Kóp bolǵanda adam barlyǵy bar ǵoı dep shalqaıyp jata berip, qaramaıdy. Іzdenip, taýyp jasaý kerek. Sodan keıin strategııalyq maqsatymyz 30 eldiń qataryna kirý bolsa, basqasha jumys isteý qajet. Árıne, bul jumys ońaı emes», - dedi Prezıdent.
Mysaly Elbasynyń aıtýynsha, ótken 25 jyldyń ishinde sol 30 memlekettiń ishine kiremin degen Qazaqstan sııaqty memleketter boldy.
«Biraq, EYDU-da 26 memleket bar sol memleketter qaldy. 200 eldiń ishinen serpilis alyp 25 jyldyń ishinde uıymǵa engen jalǵyz memleket ol Ońtústik Koreıa. Eger dúnıejúzi boıynsha jalpy ishki ónimniń ortasha jyldyq kórsetkishi sol jyldarda 2,8 paıyz bolsa, Koreıanyń ortasha jalpy ishki ónimi 5 paıyz bolǵan. Oılanyńdar. Biz jańa jaǵdaıda dál osyndaı serpiliske jetýimiz kerek. Sondyqtan barshamyz óz ustanymyzdy qaıta qaraýymyz kerek», - dedi Elbasy.
