Damýshy elderdiń bankteri kredıt talaptaryn kúsheıtýge kiristi
NUR-SULTAN. QazAqparat - Ulttyq bank Tóraǵasynyń orynbasary Álııa Moldabekova naýryzdaǵy valıýta naryǵyndaǵy jaǵdaı týraly aıtty, dep habarlaıdy QazAqparat tilshisi.
«Naýryzda AQSh memlekettik baǵaly qaǵazdarynda kiris kóbeıip, AQSh dollarynyń jahandyq deńgeıde nyǵaıa túskeni – damýshy naryqtardyń oń qarqyn alýyna múmkindik bermeı otyr. Jalǵasyp kele jatqan Covid-19 pandemııasy jáne jekelegen elderde lokdaýndardy engizý, baıaý jáne birkelki júrgizilmegen vaktsınatsııa problemalary álemdik ekonomıkanyń budan bylaıǵy ózgerý baǵytynda ózekti kúıinde qalyp otyr. Sonymen qatar, biz AQSh-taǵy kiristiń turaqty ósýi naryqtardaǵy mańyzdy draıverlerdiń birine aınalǵanyn baıqap otyrmyz», - deıdi Ulttyq Bank Tóraǵasynyń orynbasary Álııa Moldabekova.
Onyń aıtýynsha, naýryzdyń sońynda AQSh-tyń 10 jyldyq qazynashylyq oblıgatsııalarynyń kirisi 1,74% deńgeıine jetti, bul bir jyldyq kezeńge qaraǵanda óte joǵary mán. AQSh oblıgatsııalary kiristiliginiń artýy bıliktiń keń aýqymdy fıskaldyq jáne monetarlyq qoldaý sharalaryna baılanysty ınflıatsııanyń jedeldeýi týraly ınvestorlardyń alańdaýshylyǵyna baılanysty bolyp otyr.
«11 naýryzda AQSh prezıdenti D.Baıden 1,9 trln AQSh dollaryn ekonomıkany yntalandyrýǵa bólý týraly zańǵa qol qoıdy jáne taldaýshylar AQSh ekonomıkasynyń ósý boljamdaryn jaqsartýda. AQSh-tyń ІJÓ ósý qarqyny boıynsha konsensýs-boljam 2021 jyly bir aı burynǵy 4,9%-ǵa qaraǵanda 5,7-5,8%-ǵa deıin ósti. Mundaı jaǵdaıda AQSh-tyń qor ındeksteri eń joǵary mánderdi qaıta jańartady, ıaǵnı Dow Jones ındeksi bir aıda 6,6%-ǵa, S&P 4,2%-ǵa ósti.
AQSh MBQ kiristiliginiń turaqty ósýi amerıkandyq valıýtanyń odan ári nyǵaıýyna alyp keldi. DXY dollarynyń ındeksi damyǵan elderdiń valıýtalaryna qarsy bir aıda 2,6%-ǵa nyǵaıdy», - deıdi ol.
Sondaı-aq, damýshy elderdiń valıýtalary úshin naryqtyq sentıment te teris boldy: Emerging markets valıýtasynyń ındeksi 1,1%-ǵa álsiredi. EM elderiniń arasynda ortalyq bank basshysy jumystan bosatylǵannan keıin túrik lırasy (-)11,1%, Indonezııa rýpııasy (-)2%, Reseı rýbli (-)1,5% álsiredi.
«Inflıatsııanyń jyldamdaýyna qatysty qaýiptený aıasynda damýshy elderdiń keıbir ortalyq bankteri aqsha-kredıt talaptaryn kúsheıtýge kiristi. Brazılııanyń Ortalyq banki mólsherlemeni 2,75%-ǵa deıin (+0,75 p.t.), Reseıde 4,5%-ǵa deıin (+0,25 p.t.), Túrkııada 19%-ǵa deıin (+2 p.t.) kóterdi», - deıdi Álııa Moldabekova.
