DamuMed-ke qatysty hakerlik áreketter bolǵan joq - Abylaıhan Ospanov

NUR-SULTAN. QazAqparat – DamuMed-ke qatysty hakerlik áreketter bolǵan joq. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Abylaıhan Ospanov málim etti, dep habarlaıdy QazAqparat tilshisi.

«DamuMed máselesine toqtalsaq, bul jaǵdaıda eshqandaı hakerlik shabýyl bolmaǵanyn atap ótkim keledi. Osyny júz paıyz senimmen aıta alamyn. Bul rette búginde tıisti quqyq qorǵaý organdarymen jumystar júrgizilýde. Osy jaǵdaı tek adamı faktorǵa baılanysty boldy», - dedi A. Ospanov.

Vıtse-mınıstr bul máselede Densaýlyq saqtaý mınıstrligi ókilderimen pikir almasqanyn jetkizdi.

«12 adam boıynsha málimetter usynylǵan. Tekserý nátıjesinen keıin biz tıisti is-qımyldardy qabyldaımyz. Zańnama aıasynda kináliler jazasyn alady», - dedi Abylaıhan Ospanov.

Budan buryn habarlanǵandaı, «DamuMed» medıtsınalyq aqparattyq júıesiniń qupııa málimetteri áleýmettik jelige tarady. Osyǵan oraı «Damý» aqparattyq tehnologııalar kompanııasy málimdeme jasaǵan bolatyn.