Damumed arqyly aılasyn asyrǵan: Almaty oblysynda stomatologııa 66 mln teńge jymqyrǵan

ASTANA. KAZINFORM — QMA Almaty oblysy boıynsha departamenti tegin medıtsınalyq kómektiń kepildik berilgen kólemi aıasynda stomatologııalyq qyzmet kórsetý kezinde jasalǵan alaıaqtyq deregi boıynsha tergep-tekserýdi aıaqtady.

Vedomstvo deregine sáıkes jeke stomatologııalyq klınıkalarynyń dırektory Áleýmettik medıtsınalyq saqtandyrý qory KEAQ-pen jalpy somasy 450 mln teńgeden asatyn medıtsınalyq qyzmetterdi satyp alý týraly sharttar jasasqan.

Shart talaptaryna sáıkes klınıkalar mindetti áleýmettik medıtsınalyq saqtandyrý júıesi sheńberinde azamattarǵa shuǵyl jáne josparly stomatologııalyq kómek kórsetýge mindettengen. Alaıda kúdikti medıtsınalyq aqparattyq «Damumed» júıesine ortodontııalyq qyzmetter kórsetilgeni týraly jalǵan málimetter engizýdi uıymdastyrǵan. Naqtysynda atalǵan medıtsınalyq qyzmetter patsıentterge kórsetilmegen.

— Zańsyz áreketterine zańdylyq sıpat berý maqsatynda kúdikti dárigerlerdiń eseptik jazbalaryn, sondaı-aq klınıkalarǵa buryn júgingen kámeletke tolmaǵan patsıentterdiń jeke derekterin ruqsatsyz paıdalanǵan. Nátıjesinde ortodontııalyq kómek kórsetýdiń 4 597 rastalmaǵan jaǵdaıy anyqtaldy. Keltirilgen zalal somasy 66 mln teńgeni qurady. Sot sanktsııasymen banktik shottardaǵy 23 mln teńge kólemindegi qarajatqa, sondaı-aq quny 29 mln teńgege stomatologııalyq jabdyqtarǵa tyıym salyndy. Tergeý barysynda kúdikti 11 mln teńge kóleminde zalaldy ótegen. Oǵan qatysty úıqamaq túrindegi bultartpaý sharasy tańdaldy, — dedi QMA resmı ókili Ernar Taıjan.

Budan buryn agenttik 46 mlrd teńge BJZQ qarajatyn zańsyz shyǵarý boıynsha qylmystyq shemalardy uıymdastyrdy degen jalǵan stomatologııalyq klınıkalardyń biriniń ıesin ustaǵany belgili boldy.