Damýǵa resmı kómek týraly zań jobasy maquldandy - Májilis
ASTANA. QazAqparat - Búgin Parlament Májilisi «Damýǵa resmı kómek týraly» zań jobasyn maquldady. Atalǵan zań jobasy Memleket basshysynyń Jarlyǵyn oryndaý maqsatynda ázirlengen.
Zań jobasynyń negizgi maqsaty áriptes elderdiń áleýmettik-ekonomıkalyq damýyna járdemdesý maqsatynda Qazaqstannyń ol elderge damýǵa resmı kómek kórsetýi protsesinde týyndaıtyn qatynastardy quqyqtyq retteý bolyp tabylady. Sonymen qatar, zań jobasynda negizgi uǵymdardyń aıqyndamalary ashyp kórsetiledi, damýǵa resmı kómektiń maqsattary, mindetteri, qaǵıdattary men sektorlyq basymdyqtary belgilenedi.
«Bul qujat ulttyq zańnamada ǵana emes, TMD keńistiginde biregeı. Óıtkeni, TMD elderinde tek eki memlekette, Reseı men Ázerbaıjanda ǵana damýǵa resmı kómektiń júıesi bar, alaıda ol elderdiń ózinde tolyqqandy zań jumys istep turǵan joq. Qazaqstan óńirde bul baǵyttaǵy eń birinshi jumys isteıtin memleket bolyp otyr desek artyq emes. Sondyqtan da, zań jobasyn ázirleý barysynda álemdik tájirıbelerge súıendik», - deıdi Syrtqy ister mınıstri Erlan Ydyrysov.
Qujat boıynsha damýǵa resmı kómekti retteý júıesi naqty reglamentteledi. QR Úkimetiniń, ýákiletti organ retinde Syrtqy ister mınıstrliginiń damýǵa resmı kómek salasyndaǵy quzyreti aıqyndalady. Al osy saladaǵy Qazaqstannyń memlekettik saıasatyn iske asyrýǵa qatysatyn zańdy tulǵany Úkimet quratyn bolady.
«Qazaqstan resmı kómekter kórsetýdi endi ǵana qolǵa alyp otyrǵan el emes. Táýelsizdik jyldary bizdiń memleketimiz 100 mln. dollardy quraıtyn túrli formalardaǵy kómekter kórsetti. Alaıda, júıeliliktiń joqtyǵy saldarynan bul baǵytta josparlaý tıimdiligi bolmaı otyr»,- dedi SІM E. Ydyrysov.
