Damýǵa resmı kómek týraly zań qabyldandy - Parlament
ASTANA. QazAqparat - Búgin Parlament Májilisiniń jalpy otyrysynda palata depýtattary «Damýǵa resmı kómek týraly» zań jobasyna Senat engizgen ózgeristerdi talqylady. Ol boıynsha palata Senat túzetýlerimen kelisip, qujatty qabyldady.
Eske sala keteıik, qujattyń negizgi maqsaty áriptes elderdiń áleýmettik-ekonomıkalyq damýyna járdemdesý maqsatynda Qazaqstannyń ol elderge damýǵa resmı kómek kórsetýi protsesinde týyndaıtyn qatynastardy quqyqtyq retteý bolyp tabylady. Sonymen qatar, zań jobasynda negizgi uǵymdardyń aıqyndamalary ashyp kórsetiledi, damýǵa resmı kómektiń maqsattary, mindetteri, qaǵıdattary men sektorlyq basymdyqtary belgilenedi. Qujatty qabyldaý damýǵa resmı kómektiń quqyqtyq negizin qalyptastyrýǵa, osy saladaǵy qyzmetti úılestirýdi jetildirýge, kómek kórsetýdi baqylaýǵa baǵyttalyp, elimizdiń halyqaralyq arenadaǵy róli men bedelin arttyrýǵa septigin tıgizedi.
Tutastaı alǵanda, Zań boıynsha damýǵa resmı kómekti retteý júıesi naqty reglamentteledi. QR Úkimetiniń, ýákiletti organ retinde Syrtqy ister mınıstrliginiń damýǵa resmı kómek salasyndaǵy quzyreti aıqyndalady. Al osy saladaǵy Qazaqstannyń memlekettik saıasatyn iske asyrýǵa qatysatyn zańdy tulǵany Úkimet quratyn bolady.
«Senat engizgen túzetýlerge kelsek, ol qujattyń tujyrymdamalyq negizin ózgertpeıdi jáne zań jobasynyń normasyn «QR Úkimeti týraly» Konstıtýtsııalyq zańyna sáıkes keltirýge qatysty bolyp otyr», - dedi depýtat Máýlen Áshimbaev.
Budan bólek, Májilis atalǵan zańnyń ilespe qujaty bolyp tabylatyn zań jobasyn da talqylap, ony da qabyldady. Endi qujattar Memleket basshysynyń qol qoıýyna joldanady.
