Damubala jobasy: tegin úıirmeler elimizdiń barlyq óńirinde qoljetimdi me
ALMATY. KAZINFORM – 2023 jyly iske qosylǵan «Damubala» baǵdarlamasy qalaı jumys isteıdi, tegin úıirmelerge tirkelý úshin ne qajet, qandaı ózgerister engizildi? Bul saýaldarǵa Kazinform agenttiginiń tilshisi jaýap izdep kórdi.
Damubala qalaı jumys isteıdi
DamuBala – 4 pen 17 jas aralyǵyndaǵy balalarǵa arnalǵan jan basyna shaqqanda normatıvtik qarjylandyrý baǵdarlamasy boıynsha úıirmelerdi izdeý jáne olarǵa jazylý platformasy. Balany tirkeý úshin ótinishti rastaı otyryp, portalda ETsQ arqyly tirkelý qajet.Keıin balanynyń profılin quryp, sport nemese shyǵarmashylyq úıirmelerine jazýǵa bolady.
Memlekettik shyǵarmashylyq jáne sporttyq tapsyrystardy júzege asyratyn platformany jergilikti ákimdikter memlekettik satyp alý portaly arqyly anyqtaıdy.
Bıyl Damubala platformasyn Qazaqstannyń 11 oblysy men 3 megapolısi tańdaǵan.Saıttan óńirlerdiń balalar úıirmeleri úshin bólingen qarajatty da kórýge bolady. https://damubala.kz/. Resmı saıttan Almaty - Damubala baǵdarlamasyna jetkilikti kólemde aqsha bólgen jalǵyz óńir ekenin kórýge bolady.
Damubala 2025: Almatyda baǵdarlamaǵa ózgerister engizildi
2025 jyldan bastap Almatyda «Damubala» baǵdarlamasynyń mehanızmine keıbir ózgerister engizildi. Atap aıtqanda, memlekettik shyǵarmashylyq jáne sporttyq tapsyrystardy ornalastyrý jáne qarjylandyrý fýnktsııalary Almaty qalasynyń aýdandyq ákimdikterine tapsyryldy. Árbir sport jáne mádenıet baǵyttary boıynsha memlekettik tapsyrystardy júzege asyrý úshin Almaty qalasynyń 8 aýdandyq ákimdigine eseptik jazbalar quryldy.
QR «Mádenıet týraly» jáne «Dene shynyqtyrý jáne sport týraly» zańdaryna sáıkes memlekettik sporttyq jáne shyǵarmashylyq tapsyrys qyzmetterin kórsetýshi jetkizýshilerdi qabyldaý júrgizildi. 22 qańtar men 4 aqpan aralyǵynda qoldanystaǵy jáne jańa jetkizýshilerdiń ótinimderi qarastyrylyp, memlekettik shyǵarmashylyq tapsyrysty ornalastyrý qaǵıdalaryna sáıkes baǵalandy.
Sonymen qatar, oferta shartyna sáıkes, kelisimsharttar jyl saıyn qaıta jasalady. Bul ózgeris vaýcherlerdi ádil bólýge, úderistiń ashyqtyǵyn arttyrýǵa jáne jetkizýshilerdiń jaýapkershiligin kúsheıtýge baǵyttalǵan. Buryn oferta sharttarynda merzim belgilenbeıtin.
Jyl beri Almatyda oferta jańartý úderisi júrip jatyr. Degenmen, barlyq jetkizýshiler 2025 jyldyń 1-21 qańtar aralyǵynda kórsetken qyzmetteri úshin aqy alady. Baǵdarlamaǵa qatysatyn balalar sabaqtaryn jalǵastyra beredi.
Almaty máslıhaty 2025 jylǵa arnalǵan shyǵarmashylyq úıirmeler men sporttyq sektsııalardy qarjylandyrýǵa 15,1 mlrd teńge bóldi.
– Mindetine salǵyrt qaraǵan jetkizýshiler tizimnen shyǵarylady.Almaty qalasynyń Qoǵamdyq keńesimen birlesip, qyzmet kórsetýshilerdiń jumysyna monıtorıng júrgizildi. Nátıjesinde, mindetine salǵyrt qaraǵan jetkizýshiler týraly barlyq málimet quqyq qorǵaý organdaryna jiberildi. Osylaısha, baǵdarlamany júzege asyrýdyń alǵashqy kezeńi retinde qoldanystaǵy jetkizýshilermen qaıta kelisim jasaý jáne jańa ótinimderdi qarastyrý sharalary qolǵa alyndy. Árbir jetkizýshi óz ınfraqurylymynyń úıirme nemese sektsııa túrine qoıylatyn talaptarǵa sáıkestigin rastaýǵa tıis, – dep habarlady ákimdikten.
Sabaqtarǵa qatysýdy baqylaý engiziledi
Vaýcherler jetkizýshiniń balanyń zańdy ókilimen kelisimshartqa otyrǵanyna qaraı 2025 jyldyń sońyna deıin beriledi. Odan keıin balalardyń sabaqqa qatysýyn naqtylaý úshin arnaıy júıege qosylý qajet. Sondaı-aq, vaýcherler aı saıynǵy lımıt negizinde, belgili bir sanyna qaraı úlestiriledi.
Byltyr Almatyda balalardyń sabaqtarǵa naqty qatysýyn rastaý úshin bıometrııalyq sáıkestendirý (Face ID) júıesi engizilgen bolatyn. Osyǵan baılanysty, 2025 jyly jetkizýshilermen kelisimshart jasaý kezinde balalardyń 100% Face ID júıesine qosylýy mindetti shart bolmaq.
Damuala platformasyndaǵy úıirmege qatysyp júrgenderdiń biri – almatylyq Aıtóre Dúısen. 10 jastaǵy oqýshynyń qyzyǵýshylyǵy karatege túsken.
– Aptasyna úsh ret «karate» sporttyq sektsııasyna baramyn. Men Shotokan karate stılin tańdadym. Maǵan qatty unaıdy. Úsh belbeýim bar. Aq, sary jáne qyzyl, – deıdi ol.
Eske salaıyq, 2021 jyly balalardyń shyǵarmashylyq jáne sporttyq úıirmelermen qamtýǵa arnalǵan «Artsport» dep atalatyn joba bastalǵan bolatyn. Keıin quzyrly organdar osy baǵdarlama aıasynda jumys istegen kásipkerlerge qatysty birneshe qylmystyq isti ashyp, olardyń memleketke aıtarlyqtaı shyǵyn keltirgenin anyqtady.