«Damý» qorynyń kómegimen 18 kásipker sýbsıdııaǵa qol jetkizdi - Qyzylorda
QYZYLORDA. QazAqparat - Jyl basynan nesıe paıyzyn sýbsıdııalaý túrindegi kómekke Qyzylorda oblysynyń 18 shaǵyn jáne orta kásipkerlik sýbektileri qol jetkizdi, dep habarlady QazAqparat HAA tilshisi «Damý» qorynyń aımaqtyq fılıalyna silteme jasap.
Jalpy, Aımaqtyq úılestirý keńesi sýbsıdııalaý boıynsha quny 3,3 mlrd. teńge bolatyn 20 jobany maquldap, kásipkerler nesıe bereshegi boıynsha shyǵyndaryn azaıtýǵa múmkindik aldy. Bankter arasynda «Qazaqstan Halyq Banki» AQ Qyzylorda oblystyq fılıaly jobalarǵa eń kóp qarjylandyrý bólip, úzdik atanyp otyr.
Qyzylorda oblysy boıynsha aımaqtyq fılıal bólshek kepildendirý quraly aıasynda jalpy quny 140 mln.teńgeni quraıtyn 13 jobany qoldady. «Damý» qorynyń qoldaýy nátıjesinde kepil múlki jetispegen kásipkerler óz bıznesin qaıta jańǵyrtý men damytýǵa ekinshi deńgeıli bankterden nesıe qarajatyn tartýǵa múmkindik aldy.
Kásipkerlerge qyzmet kórsetý ortalyǵynyń (KQKO) keńesshileri tarapynan EDB qarjylandyrýǵa ótinish berip úlgergen shaǵyn jáne orta bıznes sýbektilerine 17 bıznes-jospar ázirlendi. 2017 jyldyń birinshi toqsanynda tegin keńestik qoldaýǵa 1470 áleýetti jáne áreket etýshi kásipkerler júgingen. Eskere ketsek, KQKO bilikti keńesshileriniń kómegimen keńes alýǵa kelgen 52 azamat jeke kásipker retinde tirkeýden ótip, óz isterin bastasa,10 kásipker ekinshi deńgeıli bankterinde nesıe qarajatyn rásimdep,óz bıznesterin damytty.
Kásipkerlerge qyzmet kórsetý ortalyǵy bazasynda 38 qatysýshy «Jańa bıznes ashýdy qoldaý» jobasy aıasynda kásipkerliktiń negizi boıynsha tegin oqýdan ótip, ekspress-kýrsty sátti aıaqtaǵandyǵy jóninde sertıfıkatqa ıe boldy.
2017 jyldyń 1 toqsanynda oryn alǵan basty jańalyq retinde,«Damý» qory men Qyzylorda oblysy Ákimdigi tarapynan shaǵyn jáne orta kásipkerlik sýbektilerin aımaqtyq qarjylandyrý baǵdarlamasyn júzege asyrý maqsatynda 2 mlrd. teńge bólingenin atap aıtýǵa bolady. Aımaqtyq baǵdarlama sheńberinde bólingen qarajat kásipkerlerge ekinshi deńgeıli bankter arqyly 8,5% ústememen úlestiriletin bolady.
Eskerte ketsek, 2016 jyly jeńildetilgen nesıe «Kazkommertsbank» AQ, «Qazaqstan Halyq Banki» AQ jáne «BankTsentrKredıt» AQ arqyly berilse, aǵymdaǵy jyly bank-seriktester sany eki esege artyp, olardyń qataryn «ATFBank» AQ, «ForteBank» AQ jáne «TsesnaBank» AQ tolyqtyryp otyr.
