«Damý» qorynyń qoldaýymen 51 joba iske qosyldy

ASTANA. QazAqparat – 2023 jyldyń ekinshi toqsanynda «Damý» qorynyń qoldaýymen Qazaqstan aýmaǵynda jalpy quny 10,5 mlrd teńgeden asatyn 51 joba iske qosyldy. Qor qoldaǵan kompanııalar ınvestıtsııa úshin, ıaǵnı qurylys, qaıta qurý, óndiris protsesin jańǵyrtý jáne jabdyq satyp alýǵa qarjy aldy, dep habarlaıdy QazAqparat Ulttyq ekonomıka mınıstrliginiń baspasóz qyzmetine silteme jasap.

Geografııalyq jaǵynan qarar bolsaq, bıyl ekinshi toqsanda eń kóp joba Shymkent qalasyna júzege asyp, 25% bolǵan. Odan keıin Túrkistan oblysy 16%, Almaty qalasy 10%, Astana qalasy 10%, basqa óńirler 39%-dy ıemdendi.
Máselen, Shymkent qalasynda «Bıznestiń jol kartasy 2025» baǵdarlamasy aıasynda polıetılen qubyr shyǵaratyn Qazaqstandaǵy eń iri fıtıngter zaýyty jabdyq satyp aldy. Zaýyt jańa daıyn ónimdi ashyq kún sáýlesinde 2 jylǵa deıin saqtaýǵa múmkindik beretin sapaly reseılik jáne koreıalyq turaqtandyrylǵan shıkizatty qoldanýmen erekshe. Bul rette jerasty tóseý kezinde zaýytta shyǵarylatyn qubyrlardyń kepildi qyzmet etý merzimi shamamen 50 jyl.
Astanada «Bıznestiń jol kartasy-2025» baǵdarlamasy boıynsha kirpish zaýyty jabdyqtar men arnaıy tehnıkany satyp alý, sondaı-aq óndiristik tsehta jóndeý-árleý jumystaryn júrgizý maqsatynda qarjylandyryldy. Elordalyq zaýytta biregeı ınnovatsııalyq tehnologııa boıynsha jáne GOST-tyń barlyq talabyn saqtaı otyryp qaptaý kirpishteri shyǵarylady. Óndiris protsesinde ekologııalyq taza materıaldar jáne tańdamaly shıkizat qoldanylady. Sondyqtan zaýytta shyǵarylatyn ónimder agressıvti ortaǵa jáne klımattyq áserge tózimdi bolyp qana qoımaı, sonymen qatar jaryqtar men synyqtarsyz estetıkalyq kórinisti saqtaı otyryp, 200 jylǵa deıin uzaq qyzmet etedi.
Petropavl qalasynda Kásipkerlikti damytý jónindegi 2021-2025 jyldarǵa arnalǵan ulttyq joba aıasynda qaladaǵy eń iri sýpermarketterdiń birin ashý úshin óndiristik jabdyqtar satyp alyndy. Bul jobanyń aıryqsha ereksheligi – sýpermarkettiń et pen qus etinen, uzaq saqtalmaıtyn nan-toqash jáne unnan jasalǵan kondıterlik ónimder daıyndalatyn óziniń óndiristik tsehy bar. Sonyń arqasynda gastronom sórelerinde árqashan eń jańa tamaq ónimderi satylady.
Qyzylordada kásipkerlikti damytý jónindegi 2021-2025 jyldarǵa arnalǵan ulttyq jobany iske asyrý aıasynda medıtsınalyq ortalyq ashyldy. Munda eresekter men balalarǵa arnalǵan biregeı emdeý-saýyqtyrý baǵdarlamalary qoldanylady. Sonymen qatar bul Qazaqstandaǵy jalǵyz klınıka, onda jumys ádisi naýqastardyń ımmýnıtetin tabıǵı qalpyna keltirýge negizdelgen. Munda tek jergilikti jáne basqa qaladaǵy patsıentter ǵana emes, sonymen qatar TMD elderiniń turǵyndary da júginedi.

Medıtsınalyq ortalyqtyń tabysty jobalarynyń ishinde áleýmettik – «ana-dáriger», onyń sheńberinde erekshe qajettilikteri bar balalardyń ata-analary shekti massajdyń ońaltý ádisterin úırendi. Bul ádistemeni odan ári kommertsııalyq maqsatta paıdalaný quqyǵy bar.
Sonymen qatar Almaty qalasynda «Bıznestiń jol kartasy-2025» baǵdarlamasy boıynsha qarjy lıtseıi salyndy. Memlekettik baǵdarlama boıynsha qarjylandyrý mektep salý úshin materıaldar jáne oqý jabdyqtaryn satyp alýǵa baǵyttaldy. Bul jobanyń biregeıligi – lıtseı Brıtandyq oqý-ádistemelik keshender negizinde aǵylshyn tilin, qarjylyq saýattylyqty, robototehnıka jáne baǵdarlamalaý boıynsha jańa daǵdylardy ala otyryp, tereńdetilgen pánderdi qosa otyryp, memlekettik bilim berý standarty boıynsha oqytýdy júrgizedi.
Statıstıkalyq derekter boıynsha 2023 jylǵy sáýir - shilde kezeńinde «Damý» qory qoldaǵan, paıdalanýǵa berilgen obektilerdiń jalpy sanynyń 35% - y óńdeýshi ónerkásipke tıesili. Budan ári turý jáne tamaqtaný jónindegi qyzmetter salasy – 18%, ınfraqurylymdy damytý – 10%, kólik jáne qoımalaý – 10%, bilim berý – 8%, Densaýlyq saqtaý jáne áleýmettik qyzmet kórsetý – 8%, basqa salalar – 11%.