Damý qory kepildik berý talaptaryn jeńildetti
ASTANA. QazAqparat - «Damý Optıma» baǵdarlamasy «Bıznestiń jol kartasy 2020» baǵdarlamasyna kirmeıtin topqa arnalǵan. Jańa baǵdarlama saýda, qyzmet kórsetý, qoǵamdyq tamaqtandyrý, qurylys sekildi salalarda qol jetimdi. «Damý Optıma» bank aldynda kepilzaty jetkiliksiz bolǵan kásipkerlerge «Damý» qorynyń kepildemesin paıdalanyp nesıe alýǵa da jaǵdaı jasaıdy, dep habarlaıdy QazAqparat Qordyń baspasóz qyzmetine silteme jasap.
2016 jyly qanatqaqty joba retinde júzege asyryla bastaǵan «Damý Optıma» baǵdarlamasyna engizilgen ózgerister qatarynda - kásipkerlerge qoıylatyn talaptardy qaıta qaraý, kepildeme berý talaptary, kepildendirýdiń jańa túrlerin engizý men qazirgi qoldanystaǵy túrin damytý da bar. Atap aıtqanda ınvestıtsııalyq maqsattaǵy nesıeniń esebinen alynǵan kez-kelgen jyljıtyn/jyljymaıtyn múlikti budan bylaı bankke kepildik retinde usynýǵa bolady. Baǵdarlamanyń buǵan deıingi talaby boıynsha mundaı jaǵdaıda úshinshi jaqtyń kepildigi kerek bolyp, kásipkerdiń barlyq kepilzattarynyń 70 paıyzy turaqty jáne ótimdi bolýy mindetteletin edi
Engizilgen taǵy bir ózgeris - «Damý»-Optıma» baǵdarlamasyna isin jańa bastaǵan kásipkerlerdiń de qoly jetetin bolǵandyǵy. Endi olar bank aldynaǵy kepilzaty jetkiliksiz bolǵan jaǵdaıda Qordan nesıe somasynyń 85 paıyzyna deıin kepildeme ala-alady. Іsin jańa bastaǵan kásipkerlerge 30 mln teńgege deıin nesıe beriledi.
Bıznesi júrip turǵan kásipkerler úshin kepildeme somasy burynǵydaı, ıaǵnı nesıe somasynyń 50 paıyzy bolyp qaldy. Bıznesi bar kásipkerler úshin beriletin nesıe somasy - ınvestıtsııalyq maqsatqa 180 mln teńgege deıin, aınalym qarajatyn tolyqtyrýǵa 60 mln teńgege deıin. Bıznesi bar kásipkerler joba qunynyń 20 paıyzyn ózderi shyǵarýy kerek.
Baǵdarlamaǵa engizilgen ózgerister boıynsha, kásipkerler «Damý»-optıma» baǵdarlamasynyń kepildemesimen ekinshi deńgeıli bankterdegi nesıesin qaıta qarjylandyra alady. Baǵdarlamanyń alǵashqy nusqasy boıynsha kepildik tek ınvestıtsııa men aınalym qarajatyna arnalǵan jańa nesıelerge ǵana qarastyrylǵan edi.
Qor «Damý-Optımanyń» kepildigin banktiń nesıe berý jaıly sheshimi shyqqanǵa deıin alýǵa bolatyndaı etip ózgeris engizýdi de josparlap otyr. Kásipker qolyna «Damý-Optımanyń» kepildigin alyp, nesıe alý úshin birneshe bankke qatar ótinim berip, jobasyn qarjylandyratyn eń yńǵaıly nusqasyn tańdap alýǵa múmkindik alady.
