«Damý» qory «G-Global» alańynda onlaın-konferentsııa ótkizedi
ASTANA. 2 tamyz. QazAqparat - 21 tamyzda «Damý» kásipkerlikti damytý qory VII Astana ekonomıkalyq forýmy aıasynda «G-Global» alańynda onlaın-konferentsııa ótkizýdi josparlap otyr.
Onda «Taýarlar, qyzmet pen tehnologııanyń básekege qabilettiligin arttyrýdyń halyqaralyq tájirıbesi» atty taqyryp qozǵalmaqshy. Bul týraly kompanııanyń baspasóz qyzmetinen habarlandy.
Toqtala ketetin jaıt, 2013 jyldyń 1 shildesinen bastap «G-Global» halyqaralyq platformasynda «VII Astana ekonomıkalyq forýmy jáne II Dúnıejúzilik daǵdarysqa qarsy konferentsııasy» vırtýaldy jobasy iske qosylǵan bolatyn. Joba aıasynda jyl boıyna Birikken Ulttyr Uıymy úshin Álemdik daǵdarysqa qarsy jospar jobasyn qalyptastyrý boıynsha zertteýler júzege asatyn bolady. Jahandyq daǵdarysqa qarsy sheshimder qabyldaýǵa barlyq nıettiler qatysa alady.
«Bul zertteýlerge osy vırtýaldy alańda «damý» qorynyń qamqorlyǵymen alty aı boıy onlaın-konferentsııalar tsıkly da engizilip otyr. Birinshi onlaın-konferentsııa aıasynda taýarlar men qyzmetterdiń básekege qabilettiligin arttyrý boıynsha halyqaralyq tájirıbelerdiń tıimdiligi máseleleri talqylanbaq. Konferentsııaǵa memlekettik organ, shaǵyn jáne orta bıznes, úkimettik emes uıymdar jáne BAQ ókilderi qatysa alady. Onlaın rejimdegi beıne-konferentsııany http://group-global.org/g2m/schedule/aef kórýge bolady», delingen baspasóz baıanynda.
