«Damý» qorynyń mobıldi keńseleri 300-den astam kásipkerge keńes berdi
ASTANA. KAZINFORM — «Damý» qorynyń mobıldi front-ofısteriniń arqasynda shalǵaı aýdandaǵy 300-den asa kásipker bıznesti damytý boıynsha keńes aldy, dep habarlaıdy Úkimettiń baspasóz qyzmeti.
Abaı oblysyna jumys sapary barysynda Premer-mınıstrdiń orynbasary — ulttyq ekonomıka mınıstri Serik Jumanǵarın shalǵaıdaǵy eldi mekendegi kásipkerlerdiń oblys ortalyǵyna barmaı-aq, memlekettik qyzmet pen konsýltatsııa alýyna kómektesetin «Damý» qorynyń mobıldi front-ofısteriniń jumysymen tanysty.
Mobıldi front-ofıs degenimiz mamandandyrylǵan shaǵyn avtobýs. Onda «Damý» qorynyń konsýltanttary, ákimdikterdiń, ekinshi deńgeıdegi bankterdiń, «Atameken» UKP, «Agrarlyq kredıttik korporatsııa» AQ, «QazAgroQarjy» AQ jáne konsaltıngtik uıym ókilderi aýyl-qalalarǵa barady. Kásipkerler qoldanystaǵy memlekettik qoldaý sharalary boıynsha jergilikti jerde keńes alyp, qarjylandyrý baǵdarlamalaryna qatysýǵa ótinim bere alady.
Mobıldi front-ofısterdiń jumysy sheńberinde kásipkerlerge sýbsıdııalaý, kepildik pen jeńildikpen kredıt berý, mıkroqarjylandyrý, lızıng, eksporttyq jobalardy qoldaý quraldary, sondaı-aq oqytý, konsýltatsııalyq súıemeldeý men kásipkerlik quzyretti damytý sekildi qarjysyz qoldaý sharasy boıynsha aqparat beriledi.
«Damý» qorynyń basqarma tóraǵasy Farhat Sársekeev atap ótkendeı, shaǵyn qalalar men aýyldyq eldi mekenderde kásipkerlikti damytýǵa baǵyttalǵan «Іsker aımaq» shaǵyn bıznesti qoldaýdyń biryńǵaı baǵdarlamasy týraly kásipkerlerdi aqparattandyrýǵa erekshe nazar aýdarylǵan.
— Bıyl «Damý» qorynyń óńirlik fılıaldary bazasynda biz «Báıterek» holdınginiń biryńǵaı front-ofısin iske qostyq. Jyl basynan beri bizge kásipkerlerden 12 myńǵa jýyq ótinish kelip tústi. Onyń ishinde Abaı oblysynan 553 jáne Shyǵys Qazaqstan oblysynan 609 ótinish bar, — dedi Farhat Sársekeev.
Búginde mobıldi front-ofıster Ulytaý, Jetisý, Abaı, Soltústik Qazaqstan, Pavlodar, Almaty, Jambyl, Qaraǵandy, Túrkistan, Qostanaı, Aqmola jáne Shyǵys Qazaqstan oblystarynda jumys isteıdi. Jaqyn arada joba elimizdiń taǵy bes óńirine taratylady. Osy bastamanyń arqasynda 300-den astam adam konsýltatsııalyq qoldaý alǵan.
Shalǵaıdaǵy eldi mekenderge barýdan basqa, mobıldi front-ofıster óńirlik kórmelerde, jármeńkelerde jáne iskerlik sharalarda jumys isteıdi. Kásipkerler tikeleı sol jerde keńes ala alady.
Semeıde mobıldik front-ofıs Ortalyq Arbattaǵy aýyl sharýashylyǵy taýar óndirýshileriniń kórmesi sheńberinde ornalastyryldy. Óńir turǵyndary men kásipkerleri bıznesti memlekettik qoldaýdyń qoldanystaǵy baǵdarlamalarymen jáne qarjylandyrý quraldarymen tanysýǵa múmkindik aldy.
Talpyn Semey balalar bilim berý ortalyǵynyń basshysy Merýert Jumasheva jumystyń mobıldi formatynyń arqasynda alǵash ret memlekettik qoldaý sharalary boıynsha keńes alǵanyn atap ótti.
— Men jármeńkeni qyzyqtaýǵa kelip, ondaǵy mobıldi front-keńseni kórgende tańǵaldym. Osyndaı is-sharalarda mamandardyń ózderiniń otyrýy óte yńǵaıly. Ýaqyt jumsamaı-aq keńes alýǵa bolady. Qazir biz bilim berý ortalyǵyn odan ári damytýdyń múmkindigin qarastyryp jatyrmyz. Sondyqtan men úshin qoldanystaǵy memlekettik qoldaý sharalary men qarjylandyrý quraldary týraly bilý mańyzdy, — deıdi kásipker.
IT salasyndaǵy jeke kásipker Rınat Jaqashev jumystyń jańa formatyn da joǵary baǵalaıdy.
— Qazir meni sýbsıdııalaý múmkindigi qyzyqtyrady. Ózim jeke qosymsha qurýdy josparlap otyr edim. Ondaǵy negizgi shyǵyndar ázirleýge emes, ónimdi jyljytýǵa baılanysty. Men úshin «Órleý» baǵdarlamasy yńǵaıly. Sebebi onda qolaıly sharttar bar. Mobıldi keńse tamasha ıdeıa eken. Tek onyń keletinin aldyn ala bilseń boldy, — deıdi ol.
Jaqyn arada mobıldi front-ofıster bazasynda shaǵyn bızneske arnalǵan konsýltatsııalyq-ońaltý ortalyqtaryn iske qosý josparlanýda. Kásipkerler damý, jobalardy keńinen taratý jáne bıznesti júrgizýde týyndaıtyn qıyndyqty eńserý máselesinde qoldaý ala alady.
Osydan buryn SQO-da 1400-den astam kásipker ekologııalyq tólemdi zańsyz tólegenin jazǵanbyz.
