«Damý» qory shaǵyn jáne orta bıznesti qoldaýdy kúsheıtpek
ASTANA. KAZINFORM — 2025 jyly jeńildetilgen qarjylandyrýǵa 271,1 mlrd teńge bólý josparlanǵan. Bul týraly Úkimet málim etti.
«Damý» qory otandyq bızneske qarjylyq jáne qarjylyq emes qoldaý kórsete otyryp, Kásipkerlikti keshendi qoldaý baǵdarlamasynyń negizgi quraldaryn iske asyrýdy jalǵastyryp otyr. ShOB-tyń turaqty damýy úshin jaǵdaı jasaýǵa jáne bank ótimdiligin ekonomıkanyń naqty sektoryna tartýǵa basty nazar aýdarylmaq.
— 2024 jyl qorytyndysy boıynsha nesıelerdi sýbsıdııalaý arqyly jeńildetilgen qarjylandyrý kólemi shamamen 1 trln teńge bolatyn 17 myńnan astam jobany qamtydy. Jalpy quny 310 mlrd teńgená quraıtyn 8 myń jobaǵa kepildik berildi. Sala boıynsha óńdeý ónerkásibi (33,3%), kólik jáne qoımalaý (17%), bilim berý (7,8%) kósh bastap tur. 2025 jyly jeńildetilgen qarjylandyrýǵa 271,1 mlrd teńge bólý josparlanyp otyr. Qarjylyq emes qoldaý aıasynda 15 myńǵa jýyq kásipker oqytylyp, bıznesti júrgizý máseleleri boıynsha 135 myńnan astam keńes berildi, — delingen habarlamada.
Aıta ketý kerek, 2025 jyldan bastap «Damý» qory bazasynda iri ınvestıtsııalyq jobalar men ShOB nesıeleýge arnalǵan eki kepildik tetigi iske qosyldy. Іri bastamalarǵa arnalǵan kepildik qory 7 mlrd teńgeden bastalatyn jobalardy qamtıdy, ekonomıkanyń negizgi sektorlaryn: ónerkásip, energetıka, ınfraqurylym jáne eksportqa baǵdarlanǵan óndiristerdi qoldaýǵa baǵyttalǵan.
ShOB qory 7 mlrd teńgege deıingi jobalardy qamtıdy jáne bıznestiń memleket qarajatyna táýeldiligin tómendetýdy jáne kepilmen qamtamasyz etilýi jetkiliksiz kásipkerlerdi qoldaýdy kózdeıdi. 2025 jylǵy 12 tamyzdaǵy jaǵdaı boıynsha qazirdiń ózinde 170,2 mlrd teńgege 1 069 joba qoldaý tapty, onyń 92,16 mlrd teńgesine kepildik berilgen. Kepildikter jeńildetilgen rásim boıynsha eki jumys kúni ishinde usynylady, negizgi baǵyttar — óńdeý ónerkásibi, kólik, qoımalaý jáne bilim berý qyzmetteri.
Buǵan deıin habarlanǵandaı, 1,1 trln teńgeden asatyn 968 uzaqmerzimdi kelisimshart jasaldy.