«Damý» qory sýbsıdııa úshin pavlodarlyq kásipkermen sottasty
ASTANA. KAZINFORM — Azamattyq ister jónindegi sot alqasy «Damý» kásipkerlikti damytý qory» AQ-nyń ótinishhaty boıynsha sýbsıdııa tóleýge baılanysty daýdy qarady.
Joǵarǵy Sottyń baspasóz qyzmetiniń málimetinshe, 2023 jyly Kásipkerlikti damytýdyń 2021-2025 jyldarǵa arnalǵan ulttyq jobasy aıasynda qor, bank jáne jeke kásipker arasynda sýbsıdııalaý sharty jasalǵan.
Qor Pavlodar qalasynda kommertsııalyq jyljymaıtyn múlik satyp alý úshin alǵan nesıesi boıynsha paıyzdyq mólsherlemeniń bir bóligin sýbsıdııalaýǵa mindettengen.
Bıznes-josparǵa sáıkes, jeke kásipkerdiń negizgi qyzmeti — nan, jańa unnan jasalǵan kondıterlik ónimder, torttar, bálishter óndirý.
Alaıda, qor sýbsıdııalanatyn jobalarǵa josparly monıtorıng júrgize kele, jeke kásipkerdiń satyp alǵan turǵyn úı-jaılarynda (dúkeninde) toqyma buıymdaryn, sabyn jáne alkogol ónimderin satý bólimsheleri ornalasqanyn anyqtaǵan. Bul rette, nan jáne jańa unnan jasalǵan kondıterlik ónimder daıyndalmaǵan.
Nesıe qarajatyn maqsatsyz paıdalanǵanyn alǵa tartyp, qor jeke kásipkerden shamamen 8,4 mıllıon teńge kóleminde tólengen sýbsıdııany sot arqyly qaıtarýdy talap etken. Jeke kásipker, óz kezeginde, qordyń sýbsıdııalardy tóleýdi toqtatý jónindegi áreketiniń zańdylyǵyn daýlap, qarsy talap qoıǵan.
Birinshi satydaǵy sot daýdyń mán-jaıyna durys baǵa berip, qordyń talap qoıýyn qanaǵattandyryp, jeke kásipkerdiń qarsy talap qoıýyn qanaǵattandyrýdan bas tartqan.
Alaıda, apellıatsııalyq sot munymen kelispeı, jeke kásipker jaǵyna shyqqan.
— Joǵarǵy Sot jeke kásipker sýbsıdııalaý shartyn jáne bıznes-jospardy tıisinshe oryndaǵanyn, atap aıtqanda sýbsıdııa berilgen jobanyń oryndalý maqsatyn dáleldemegenin aıtyp, birinshi satydaǵy sottyń sheshimin ózgerissiz qaldyrdy. Sonymen qatar, sýbsıdııalardy maqsatsyz paıdalaný faktisi rastaldy: alynǵan úı-jaılarynan, unnan jasalǵan kondıterlik ónimder, torttarmen bálishterdi óndirý úshin paıdalanylmaıdy, al osy maqsatqa basqa úı-jaılardy jalǵa alǵany týraly dáleldemeler kórsetilmegen, — delingen habarlamada.
Osyǵan deıin Pavlodar oblysynda tabıǵat qorǵaý zańnamasyn buzǵan 35 derek tirkelgenin jazǵan edik.