«Damý -Kómek» qarjylaı emes kómek kórsetý baǵdarlamasy sátti júrgizilýde
ALMATY. Mamyrdyń 25-i. QazAqparat /Ádilet Musahaev/ - «Damý - Kómek» baǵdarlamasy múmkindikteri shekteýli kásipkerlerdiń máseleleri men olarǵa qajetti resýrstar jaıyndaǵy aqparattarmen qoǵamymyzdy molynan habardar etý arqyly qoldaý kórsetý maqsatynda qurylǵan. Bul jaıynda «Damý» qory Basqarmasynyń tóraǵasy Bolat Muqyshev búgingi ótken baspasóz máslıhatynda aıtty,
dep habarlaıdy QazAqparat.
B.Muqyshev osy máseleni sheshý úshin, 2009 jyldyń jeltoqsanynda múmkindikteri shekteýli kásipkerlerge kómek kórsetý maqsatyndaǵy aqparatpen almasýǵa arnalǵan habarlandyrýlardyń elektrondyq taqtasy túrindegi www.damu-komek.kz saıty ashylǵandyǵyn jetkizdi. Kómek qajetsinip otyrǵan jandar «Kómek qajet» degen bólimde óz aqparattaryn usyna alady, al ıgilikti iske atsalysqysy keletin kásipkerler «Kómek kórsetemin» degen bólimde muqtaj jandarǵa kómegin usyný arqyly ún qosa alady.
«Osyndaı jobalardy iske asyrý tájirıbesi kórsetkendeı, kóbinese kómek alýshylardan góri kómek kórsetkisi keletinderdiń sany basym bolyp otyr. Alaıda, ýaqyttyń tyǵyzdyǵy, qalaı jáne nemen kómek kórsetýdi naqty bilmeý tárizdi obektıvti sebeptermen olar ózderiniń izgi nıetterin júzege asyra almaı jatady», deıdi B.Muqyshev.
Atalmysh baǵdarlamanyń basty ereksheligi, múmkindiginiń shekteýli ekenine qaramaı óz isimen shuǵyldanyp, turaqty tabys tabýǵa, qoǵam ómirine tolyq jáne teń dárejede atsalysýǵa talpynyp otyrǵan jandarǵa ár adam shama-sharqyna qaraı naqty ataýly kómek kórsetý arqyly úles qosa alady.
«Demeýshiler keıbir kásipkerlerge qural-jabdyq túrinde kómek te berip jatyr. Barlyǵy 15-teı adam tigin mashınalaryna, kóshirme-kóbeıtkish apparattarǵa, aıaq-kıim jóndeý sheberhanasyna arnalǵan jabdyqtar men taǵy basqa zattarǵa ıe boldy», deıdi Basqarma tóraǵasy.
«Qazirgi kúni bıznes pen otandyq óndiris kompanııalardy qoldaý úshin úlken jumystar atqarylyp jatyr. Sol jumystardy durys júrgizý úshin «Damý» qory elimizdiń óndiris kompanııalaryn jınap múmkindigi shekteýli kásipkerlerge kómek kórsetý jaıynda másele kótergen edi. Biz óz tarapymyzdan bul bastamany qoldap, úlesimizdi qosýdamyz», deıdi qazaqstandyq «KazStroıSteklo» óndiristik kompanııasynyń tóraǵasy Murathan Toqmadı.
«Damý» qorynyń bul bastamasy qazirgi tańdaǵy múgedekterdiń áleýmettik máselelerin sheshýge óz septigin tıgizýde. Olardyń kásibin ashyp, el qatarly jumysyna jaǵdaı jasap otyrǵan atlmysh Qorǵa alǵysymdy aıtqym keledi», deıdi Almaty qalalyq múgedekter qoǵamynyń tóraǵasy Álı Amanbaev
«Damý-Kómek» baǵdarlamasy boıynsha kómek kórsetken demeýshiler qatarynda «Astana-Motors», «QazQurylysShyny», «Allianz Kazakhstan» saqtandyrý kompanııasy, «AKF «Volna» JShS-si (Aqtaý) jáne «Qazaqstan Halyq banki» AQ, «Kazkommertsbank» AQ men Atyraý jáne Qyzylorda oblystarynyń kásipkerleri bar.
