«Damý» kásipkerlikti damytý qory «Bıznes-keńesshi» baǵdarlamasynyń ekinshi kezeńin júzege asyrýǵa kiristi
ALMATY. Sáýirdiń 7-si. QazAqparat /Erlik Erjanuly/ - «Damý» kásipkerlikti damytý qory» AQ shaǵyn jáne orta kásipkerlikke qarjylaı emes qoldaý kórsetý sharalaryn odan ári jalǵastyrýda,
dep habarlaıdy QazAqparat qordyń baspasóz qyzmetine silteme jasap.
Qor sáýir aıynan bastap «Bıznes-keńesshi» baǵdarlamasynyń 2-shi kezeńin júzege asyra bastady. Onyń aıasynda qala men aýdan ortalyqtarynda «Kásipkerliktiń jedel kýrsy» atty eki kúndik oqytý kýrstary ótkizilip, shaǵyn jáne orta kásipkerlik sýbektileri men kásipkerlikpen aınalysýǵa yntaly turǵyndarǵa aqparattyq-konsaltıngtik qoldaý kórsetiledi. Oqytý kýrstaryna kásipkerler men turǵyndardy kóbirek qamtý maqsatymen bıyl ol kóktem jáne kúz aılarynda ótkiziletin bolady. Keshe Ońtústik Qazaqstan oblysynyń Saıram jáne Pavlodar oblysynyń Baıanaýyl aýdandarynda alǵashqy eki kúndik trenıng-kýrstar aıaqtaldy.
Jalpy «Bıznes-keńesshi» baǵdarlamasy «Samuryq-Qazyna» ulttyq ál-aýqat qory» men «Damý» kásipkerlikti damytý qory» AQ-darynyń birlesken jobasy. Ol Qazaqstannyń barlyq aýdandaryndaǵy kásipkerler men jeke kásibin jasaýǵa yntaly turǵyndarǵa bıznesti ashý jáne ony tıimdi júrgizý boıynsha keshendi, biryńǵaı jáne tegin bilim berýdi kózdeıdi. Bul óz kezeginde shaǵyn jáne orta kásipkerlikti qarjylaı emes qoldaýdyń tıimdi quraldarynyń biri bolyp tabylady jáne memlekettiń shaǵyn jáne orta kásipkerlikti qoldaý jónindegi sharalarynyń zańdy jalǵasy bolyp tabylady.
Baǵdarlamanyń alǵashqy kezeńinde byltyr oqytý kýrstary respýblıkadaǵy 209 aýdan men qalalarda uıymdastyryldy. Oǵan 11 603 tyńdaýshy qatysty. Olardyń 40 paıyzy kásipkerler, 60 paıyzy jeke tulǵalar. Oqý kýrsy bes bólimnen quralǵan: kásipkerlik negizderi, kásipkerlik psıhologııasy, marketıng, kásip ashý men júrgizýdiń zańdyq aspektileri jáne qyzmetkerlerdi basqarý.
