Damý ınstıtýttary memleket qarajatyn tıimsiz paıdalanyp keledi - N. Joldasbaeva
ASTANA. Naýryzdyń 5-i. QazAqparat /Qanat Mámetqazyuly/ - Qazaqstannyń damý ınstıtýttary memleket qarajatyn tıimsiz paıdalanyp keledi. Búgin QR Parlamenti Senatynyń jalpy otyrysynda Úkimet basshysynyń atyna joldaǵan saýalynda senator Nurlyǵaıym Joldasbaeva osylaı málim etti,
dep habarlaıdy QazAqparat.
Senatordyń aıtýynsha, Esep komıtetiniń tekseristeri birqatar damý ınstıtýttarynyń memleket qarajattaryn tıimsiz paıdalanyp jatqanyn anyqtap bergen. «Atap aıtqanda, tek «Qazaqstannyń Investıtsııalyq qory» AQ-nyń ózinde 2007-2008 jyldardaǵy zalaldy shyǵyndary 13,7 mlrd. teńgeni quraǵan. Bunymen qosa, atalǵan qor tarapynan qarjylandyrǵan jobalardyń tek ekeýi ǵana aıaqtalyp, qalǵan 18-i áli júrgizilip keledi. 2004 jyldan beri qarjylandyrylyp kele jatqan jáne 2006-2009 jyldary aıaqtalýy tıis 16 ınvestıtsııalyq joba áli de qoldanysqa berilmedi. Budan bólek, 20 shaqty jobalarǵa qatysty aryz-shaǵymdar tekserilip jatyr», dedi N. Joldasbaeva.
Onyń aıtýynsha, dál osyǵan uqsas jaǵdaı «Ulttyq ınnovatsııalyq qor» AQ-da da oryn alǵan. Bul qor elimizdegi jalpy ınnovatsııalyq belsendilikti arttyrý maqsatynda qurylǵan bolatyn. 2003-2007 jyldary aralyǵynda «Ulttyq ınnovatsııalyq qor» AQ-nyń jarǵylyq kapıtalyn toltyrýǵa 32,3 mlrd. teńge bólingen. «Biraq Esep komıtetiniń málimetterine qaraǵanda, 2003, 2006, 2008 jyldary atalǵan Qor tarapynan 11,8 mlrd. teńge zalal keltirilgen. Tipti 2006 jyly 838 mln. teńgesin «ValıýTranzıt» bankke ornalastyrǵan, endi qarajat qaıtarylmaıtyn shyǵyndar retinde eseptelýde», dedi senator. Sonymen birge, depýtat bulardan bólek taǵy birqatar damý ınstıtýttarynyń qyzmetinde ketken olqylyqtardy aldyǵa tartyp, olar boıynsha naqty mysaldar keltirdi.
«Aǵymdaǵy jylǵy Elbasynyń Joldaýy boıynsha elimizde jalpy aýqymy 6,5 trıllıon teńge ınvestıtsııany quraıtyn 162 jobany júzege asyrý josparlanýda. Bunymen qosa, óńdeýshi ónerkásiptegi eńbek ónimdiligi 2 esege, aýyl sharýashylyǵynda kem degende 4 esege, al kásiporyndardyń ınnovatsııalyq aktıvter úlesi 4-ten 20 paıyzǵa artýy tıis. Alaıda, damý ınstıtýttary sýbektileri senimnen shyqpaı otyr, naqty úılestirý júıesi, naqty monıtorıng joq. Zalaldardyń oryn alýy da baqylaýdyń joqtyǵyn bildiredi. Sondyqtan da, jańa qarjy quraldary qalaı jumsalatynyn, baqylaý júıesiniń ózgeristerin bilip otyrý qajet», dedi senator.
