Damý erekshelikteri bar oqýshylarǵa kómektesetin 1500-ge jýyq pedagog-assıstent jumysqa kiristi

NUR-SULTAN. QazAqparat – Jańa oqý jylynyń basynan bastap Qazaqstan mektepterinde 1 500-ge jýyq pedagog-assıstent jumysqa kiristi. Olar damý erekshelikteri bar oqýshylarǵa mektepke beıimdelýge kómektesedi, dep habarlaıdy QazAqparat Oqý-aǵartý mınıstrliginiń baspasóz qyzmetine silteme jasap.

«Byltyrdyń basynda el mektepterinde osyndaı 700 pedagog jumys istese, osy oqý jylynyń basynda olardyń sany 1 500-ge deıin kóbeıdi. Pedagog-assıstentter erekshe balalarmen jumys isteýde mańyzdy ról atqarady, olar balalardy baǵyttap, beıimdelýge kómektesedi. Bul erekshe qajettilikteri bar balalar týraly bolǵandyqtan, pedagog-assıstentter tehnıkalyq qoldaý da kórsete alady, mysaly bala ózdiginen qozǵala almasa. Sondaı-aq, eger balaǵa defektologtyń kómegi qajet bolsa, pedagogıkalyq qoldaý kórsetedi», - dedi Oqý-aǵartý mınıstrliginiń Mektepke deıingi jáne orta bilim komıtetiniń tóraǵasy Gúlmıra Kárimova.

Sonymen qatar, pedagog-assıstent erekshe bilim berý qajettilikteri bar balalarǵa arnalǵan jeke bilim berý baǵdarlamalaryn ázirleýge qatysady. Oqý baǵdarlamalary erekshe balalardyń qajettilikterine qaraı beıimdeledi. Pedagog-assıstentter olarǵa ótken materıaldy meńgerýge kómektesedi. Onymen qosa, olar mektep qabyrǵasynda erekshe balalardyń qaýipsizdigi men densaýlyǵyna qajetti jaǵdaılardyń saqtalýyn qadaǵalaıdy.

Aldaǵy ýaqytta mınıstrlik mektepke deıingi bilim berý uıymdarynda pedagog-assıstent laýazymyn engizýdi josparlap otyr.

Aıta ketsek, Memleket basshysy jýyrdaǵy Joldaýynda bilim salasyna qatysty birqatar máseleni kóterdi. Oqý-aǵartý mınıstri Ashat Aımaǵambetov málim etkendeı, Prezıdent júktegen mindetterdi sheshý maqsatynda mınıstrlik janynan jumys toby quryldy.