Damý boljamynyń negizgi kórsetkishteri saqtaldy- Rýslan Dálenov

NUR-SULTAN. QazAqparat – Jyldyq ınflıatsııanyń nysanaly dálizi 4-6 paıyz sheginde saqtalady. Bul týraly QR Parlamenti Májilisiniń jalpy otyrysynda QR Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

«2019 jylǵa arnalǵan respýblıkalyq bıýdjetti naqtylaý kezinde eldiń áleýmettik-ekonomıkalyq damý boljamynyń negizgi kórsetkishteri saqtaldy. Bul jalpy ishki ónimniń 3,8 paıyz deńgeıinde ósýi, 89 mln tonna kóleminde munaı óndirý eskerilgen. Munaıdyń álemdik baǵasy joǵary qubylmalylyqty kórsetip otyr. Osyny eskere otyryp, munaıdyń boljamdy baǵasy barreline 55 AQSh dollary deńgeıinde saqtaldy», - dedi mınıstr.

Onyń atap ótýinshe, jyldyq ınflıatsııanyń nysanaly dálizi 4-6 paıyz sheginde tur.

«Jalpy, respýblıkalyq bıýdjettiń kiristeri (transfertterdi esepke almaǵanda) 2019 jyly 7 trln 81 mlrd teńgeni quraıdy. Túsimder túrleri boıynsha kirister qurylymy saqtalady. Kólemdi túsimderdi qosylǵan qun salyǵy (2,8 trln teńge), korporatıvtik tabys salyǵy (2 trln teńge), halyqaralyq saýdaǵa salynatyn salyqtar (1,5 trln teńge) qamtydy», - dedi Rýslan Dálenov.

Belgili bolǵandaı, túsimderdiń jalpy kólemi 95 mlrd teńgege ósip, 10,7 trln teńgeni quramaq. Transfertterdiń túsimderi, onyń ishinde Ulttyq qordan transfertter óspeıdi. Shyǵystar 95 mlrd. teńgege artady, bul kiristerdiń ósýimen sáıkes keledi. Respýblıkalyq bıýdjet shyǵystarynyń kólemi 12 trln teńgeden asady.