Damır Ryspaevpen tóbelesken qytaılyq hokkeıshi aýrýhanaǵa jatqyzyldy

«Biz arenadan qonaqúıge endi ǵana ketip baramyz, al ol aýrýhanaǵa dárigermen birge ketti. Biz ony áli kórgen joqpyz, mıy shaıqalýy múmkin, bassúıek-mı jaraqaty bolýy da ǵajap emes. Ázirge dál aıta almaımyz», - dedi qytaılyq komandanyń baspasóz qyzmeti.

Aıta keteıik, búgin "Kýnlýn Red Star" komandasy Astanada QR Prezıdenti Kýbogi jolyndaǵy jarysta «Barys» komandasynan ońbaı taıaq jedi. Saldarynan «Barys» klýbynyń eki hokkeıshisi Damır Ryspaev pen Madııar Ibraıbekov macht sońyna deıin shettetildi. Óz kezeginde, tóbeleste qatty soqqy jegen qytaılyq "Kýnlýn Red Star" komandasy machty ary qaraı jalǵastyrýdan bas tartty jáne sol úshin olarǵa 5:0 esebimen jeńilis jazyldy.

Osylaısha, astanalyqtar Dastın Boıd úshin ese qaıtardy. Este bolsa, 5 tamyzda «Barys» komandasynyń shabýylshysy Dastın Boıd "Kýnlýn Red Star" hokkeıshilerine qarsy bolǵan oıynda aıaǵyn syndyryp alǵan bolatyn. Sol matchta dórekilikpen erekshe kózge túsken qytaılyqtar jeńiske de jetken edi. Osynyń kesirinen «Barystyń» 41-shi nómirli oıynshysy 4 aıǵa deıin jarys jolynan shyǵyp qaldy.

Erteń «Barys komandasy "Metallýrg Nk" klýbyna qarsy oınaıdy.  Bastalýy - 19.00 saǵat.