Damır Bekbosynov United World Wrestling atqarýshy keńesiniń múshesi atandy
ASTANA. KAZINFORM — Qazaq Kuresi Assotsıatsııasynyń bas dırektory Damır Bekbosynovqa UWW ulttyq kúres túrleri komıtetiniń atqarýshy keńesi múshesiniń tósbelgisi tabystaldy.
Úndistannyń Delı qalasynda ótken Álem chempıonatynda Qazaq Kuresi Assotsıatsııasynyń bas dırektory Damır Bekbosynovtyń bedeldi halyqaralyq sport uıymy bolyp tabylatyn Birikken kúres álemi (United World Wrestling — UWW) ulttyq kúres túrleri komıteti atqarýshy keńesiniń músheligine qabyldanǵany belgili boldy.
Sporttyq shara barysynda qazaq kúresin halyqaralyq arenada nasıhattaıtyn bul chempıonattyń mańyzdylyǵyn tilge tıek etken UWW tehnıkalyq delegaty Onýr Shımshek Qazaq Kuresi Assotsıatsııasynyń bas dırektory Damır Bekbosynovqa UWW ulttyq kúres túrleri komıtetiniń atqarýshy keńesi múshesiniń tósbelgisin tabystady.
Aıta ketsek, Qazaq Kuresi Assotsıatsııasy 2022 jyly UWW uıymynyń músheligine qabyldanǵan bolatyn. Sodan beri Assotsıatsııa halyqaralyq jarystaryn atalmysh uıymnyń aıasynda ótkizýde.
Qoryta aıtqanda, Damır Ásenǵazyulynyń tarıhy 1905 jyldan bastaý alatyn bedeldi sport uıymy — UWW ulttyq kúres túrleri komıteti atqarýshy keńesiniń músheligine qabyldanýy qazaq kúresiniń yqpalyn arttyrýǵa jáne halyqaralyq arenada jańa múmkindikterge jol ashýǵa baǵyttalǵan mańyzdy qadam.
Aldaǵy ýaqytta bul áriptestik halyqaralyq arenada tól kúresimizdiń áleýetin nyǵaıtýǵa, halyqaralyq jarystardy ótkizýdi jalǵastyrýǵa jáne sportshylarymyzdyń sheberligin jańa deńgeıge kóterýge múmkindik beredi.
United World Wrestling maqsaty — kúres túrleriniń damýyn yntalandyrý jáne bul sport túrlerin búkil álem elderinde damytý, ulttyq federatsııalar arasyndaǵy dostyq qatynastardy damytýǵa járdemdesý, kúresti Olımpıada oıyndarynda, Álem chempıonattary men kýboktarynda, kontınenttik jarystarda jáne federatsııalardyń baqylaýynda ótetin barlyq halyqaralyq is-sharada sport túri retinde usyný jáne Olımpıadalyq qozǵalys aıasynda onyń múddelerin qorǵaý.
Álem chempıonatynyń demeýshileri — «Samuryq-Qazyna» ulttyq ál-aýqat qory» aktsıonerlik qoǵamy jáne Sport Qory sportty qoldaý qory.
Osyǵan deıin Delıdegi qazaq kúresinen álem birinshiligi máresine jetkenin jazǵan edik.