Damır Bekbosynov: Kúresten el birinshiliginiń jeńimpazdaryna júıeli túrde qarjylaı qoldaý kórsetemiz
ASTANA.KAZINFORM – Elordadaǵy «Qazaqstan» jeńil atletıka kesheninde grek-rım, erkin jáne áıelder kúresinen U17 jáne U20 jas arasyndaǵy Qazaqstan chempıonaty máresine jetti. On kúnge sozylǵan dodaǵa elimizdiń barlyq óńirinen 1 200-den astam jas sportshy qatysyp, bozkilemde óz sheberligin synady.
Qazaqstan kúres federatsııasy baspasóz qyzmetiniń habarlaýynsha, bul chempıonatta otandyq kúrestiń tarıhynda tuńǵysh ret júldegerlerge syıaqy tabystalady, jalpy júlde qory – 60 mln teńge.
Qazaqstan kúres federatsııasynyń bas hatshysy Damır Bekbosynovtyń aıtýynsha, bıylǵy qarjylaı yntalandyrý tek U17 jáne U20 sanattarymen shektelmeıdi. Federatsııa jas erekshelikterine qaraı ótetin barlyq negizgi Qazaqstan chempıonattarynyń júldegerlerin júıeli túrde qoldaýdy qolǵa alǵan.
– Qazaqstan kúres federatsııasynyń prezıdenti Oqasov Erkin Qadyrǵalıulynyń qoldaýymen bıylǵy Qazaqstan chempıonattaryna jalpy quny 200 mıllıon teńge qomaqty júlde qory qarastyrylyp otyr. Mysaly, U15 jas sanatynyń jeńimpazyna 200 myń teńge, U17 sanatynda 300 myń, U20 men U23 sanattarynda 500 myń teńge, al eresekter arasyndaǵy Qazaqstan chempıondaryna 1 mıllıon teńge beriledi. Bul – sportshylar men jattyqtyrýshylar úshin naqty qoldaý. Osyndaı qoldaýdyń arqasynda chempıonattarymyzdyń deńgeıi de arta túsedi dep senemin, – dedi Damır Ásenǵazyuly.
Sonymen qatar chempıonatta sportshylardyń kúres kezinde kórsetken qaısar minez ben sheberlik kórsetken sportshylarda federatsııa tarapynan «Qaısar rýh» jáne «Dara tásil» atalymy boıynsha marapattaldy.
Osyǵan deıin habarlaǵanymyzdaı, Qazaqstandyq balýandar Albanııanyń Tırana qalasynda ótken kúres túrleri boıynsha reıtıngilik týrnırde 11 medal jeńip aldy.
