Damylsyz jumys istedik – SQO-da 21 kún boıy tasqynmen kúresken óskemendik qutqarýshy
ÓSKEMEN. KAZINFORM – Soltústik Qazaqstandaǵy sý tasqynynyń saldaryn joıýǵa ShQO-dan attanǵan qutqarýshylardyń biri – Denıs Lynov. Ol áriptesterimen birge halyqty sý basqan jerlerden evakýatsııalady.
Denıs Lynov tótenshe jaǵdaılar júıesinde 8 jyldan astam ýaqyt jumys istep keledi. Shyǵys Qazaqstandaǵy 2018 jylǵy sý tasqynynyń zardabyn joıýǵa qatysyp, adamdardy qutqarýǵa kómektesti.
Jaqynda ol Soltústik Qazaqstan oblysynan oraldy. Onda áriptesterimen birge halyqty sý basqan jerlerden evakýatsııalady.
«Biz Amangeldi aýdanynda jumys istedik. «Sherp» kóligimen turǵyndardy qaýipti aımaqtan shyǵardyq. Táýlik boıy damylsyz jumys istedik. Keıde 1,5 metrge deıin kóterilgen sýdy eńserýge týra keldi. 30-ǵa jýyq azamat, onyń ishinde balalar men aýyr naýqastardy evakýatsııaladyq. Sondaı-aq gýmanıtarlyq júkti jetkizip otyrdyq. Barlyǵy 21 kún boıy qyzmet atqardyq. Meniń oıymsha, biz aldymyzda qoıylǵan mindetterdi oryndap shyqtyq», - dedi ShQO TJD jedel-qutqarý jasaǵynyń bas qutqarýshysy Denıs Lynov.
Denıs Lynovtyń áriptesteri ony kez kelgen kedergilerdi jeńe alatyn kásibı qutqarýshy-júrgizýshi ǵana emes, tamasha mehanık ekenin aıtady. Ol KamAzdyń «tilin» jaqsy túsinip, qyr-syryn ábden meńgergen. Jasaq qyzmetkerleriniń aıtýynsha, Lynovpen birge otqa da, sýǵa da barý qorqynyshty emes.
