Damaskidegi ál- Farabı kesenesi men tarıhı-mádenı ortalyqtyń qurylysy jyl sońyna deıin tolyq aıaqtalady - Mádenıet mınıstri
/Qanat Mámetqazyuly/ - Damaskidegi ál- Farabı kesenesi men tarıhı-mádenı ortalyqtyń qurylysy jyl sońyna deıin tolyq aıaqtalady. Bul týraly búgin QR Parlamenti Májilisinde ótkenÚkimet saǵatynda Mádenıet mınıstri Muhtar Qul-Muhammed málim etti.
Mınıstrdiń aıtýynsha, qazirgi tańda Damaskidegi ál- Farabı kesenesi men tarıhı-mádenı ortalyǵynyń qurylysyn salý jumystarynyń 65 paıyzy oryndalǵan. «Bul - meshiti, tarıh pen mádenıet týraly ekspozıtsııalyq zaly,oqý zaly men Internet-kafesi, kitaphanasy, konferentszaly, qonaqúıi bar kóp salaly nysan. Jyl aıaǵyna deıin qurylys jumysyn tolyǵymen aıaqtaý josparlanyp otyr», - deıdi M. Qul-Muhammed. Budan bólek, mınıstrdiń aıtýynsha, QR Prezıdentiniń tapsyrmasyna sáıkes, aǵymdaǵy jyldyń kókteminde Tashkent qalasyndaǵy Abaı Qunanbaıulynyń eskertkishi qurylysynyń jumystary aıaqtalǵan. «Orynbor qalasynda Ahmet Baıtursynuly turǵan úıge jáne birinshi, ekinshi jalpyqazaq sezi ótken ǵımaratqa saltanatty túrde eskertkish taqtalar ornatyldy. Qazaqstandaǵy sekildi Reseıde de kún saıyn jekeshelendirýdiń qarqyndy júrgizilip jatqanyn eskersek, erteńgi kúni mundaı ǵımarattardan kóz jazyp qalýymyz múmkin edi. Sondyqtan buny da alash qaıratkerleriniń esimin ardaqtaýdaǵy mańyzdy oqıǵa dep qaraýymyz kerek», - dedi mınıstr. Sondaı-aq, M. Qul-Muhammed elimizde alty eskertkish qaıta qalpyna keltirilgenin atap ótti. Osyndaı eskertkishterdiń arasynda Bókeı Ordasyndaǵy Han ordasy sekildi asa mańyzdy nysandar da bar.
