Dálenov óńirlerdiń 10 aıdaǵy negizgi kórsetkishterin atady

NUR-SULTAN. QazAqparat - 2019 jyldyń qańtar-qazanynda qurylys jáne negizgi kapıtalǵa ınvestıtsııalar boıynsha artta qalǵan óńirler sany qysqardy. Bul týraly búgin Úkimet otyrysynda elimizdiń 10 aıdaǵy áleýmettik-ekonomıkalyq damý qorytyndysy jaıynda baıandaǵan Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Negizgi kórsetkishter boıynsha óńirlerdiń kóbinde ósim bar. Ónerkásip boıynsha Mańǵystaý oblysy 0,2 paıyz ósim kórsetti. Sonymen qatar, Batys Qazaqstan jáne Qyzylorda oblystarynda áli de tómendeý oryn alýda. Aýyl sharýashylyǵy boıynsha Qostanaı oblysynda ǵana ónim shyǵarý tómendedi. Bul rette tómendeý 33,8-den 22,8 paıyzǵa deıin qysqardy», - dedi mınıstr.

Onyń atap ótýinshe, qurylys jáne negizgi kapıtalǵa ınvestıtsııalar boıynsha artta qalǵan óńirler sany qysqardy. Máselen, Soltústik Qazaqstan oblysy qurylys boıynsha 3,9 paıyz deńgeıinde, Mańǵystaý oblysy ınvestıtsııalar boıynsha 2,9 paıyz deńgeıinde oń ósim kórsetti. Sonymen qatar, qurylys jáne ınvestıtsııalar boıynsha Nur-Sultan jáne Shymkent qalalarynda tómendeý baıqaldy. Munan basqa, Mańǵystaý oblysynda qurylys jumystary tómendedi.

«Birqatar óńirler birneshe kórsetkish boıynsha serpindi ósim kórsetip otyr. Shyǵys Qazaqstan jáne Qyzylorda oblystary 4 kórsetkish boıynsha, Qaraǵandy, Batys Qazaqstan jáne Aqmola oblystary 3 kórsetkish boıynsha joǵary ósim kórsetti», - dedi ol.

R.Dálenovtiń dereginshe, Nur-Sultan qalasynda 3 kórsetkish boıynsha, Mańǵystaý oblysynda 2 kórsetkish boıynsha tómendeý baıqaldy. Odan basqa, Mańǵystaý oblysynda qyrkúıekpen salystyrǵanda 3 kórsetkish boıynsha báseńdeý tirkeldi.

«Almaty, Jambyl, Qostanaı jáne Soltústik Qazaqstan oblystarynda 1 kórsetkish boıynsha tómendeý jáne 2 kórsetkish boıynsha báseńdeý baıqaldy», - dedi mınıstr.