Dálel tappaǵan tergeýshiniń jaǵdaıy qıyndaıdy
ASTANA. QazAqparat - Kúdiktige negizsiz aıyp taqqan tergeý organdaryna qatysty jaýapkershilik kúsheıtiledi. Bul týraly Parlament Májilisinde QR Bas prokýrorynyń orynbasary Marat Ahmetjanov málim etti, dep habarlaıdy QazAqparat.
«Kelesi bir problemaǵa toqtalyp óteıin. Máselen, tergeý organdary isti bir fakti boıynsha qozǵaıdy, al keıin osy fakti aıasynda dálel tappasa, basqa ilik izdeı bastaıdy. Bul turǵyda adam quqyǵyna nuqsan keltiriledi. Sebebi tergeý úshin eń basty másele - ol adamdy zańsyz jaýapqa tartqanyna jaýap bermeý. Endi naqty is boıynsha dálel joq bolsa, is jabylyp, bul baǵytta tergeý organdarynyń jaýapkershiligin kúsheıtemiz», - dedi M. Ahmetjanov «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Sonymen qatar ol jedel izdestirý sharalaryna qatysty usynylyp otyrǵan ózgerister jaıynda aıtyp berdi.
«Qazir arnaıy jedel izdestirý sharalaryn barlyq qylmystar boıynsha júrgizýge bolady, tipti aýyr qylmystardy da. Endi olardyń sany qysqarady. Tek aýyr, asa aýyr jáne aýyrlyǵy ortasha birneshe qylmystar qalady», - dedi Bas prokýrordyń orynbasary.
Budan buryn habarlanǵandaı, zań jobasyn tanystyrý barysynda Marat Ahmetjanov Qazaqstanda qylmystardy qaraý merzimi qysqaratynyn málim etti.
Munymen qosa, ekonomıkalyq qylmys jasady degen kúdikke ilingen adamdar úshin sanktsııalar jeńildetilmek.
