«Dalanyń kúıshi Dınasy» dramasynyń premerasy
ASTANA. 8 maýsym. QazAqparat - Q.Qýanyshbaev atyndaǵy Memlekettik akademııalyq qazaq mýzykalyq drama teatrynda maýsym aıynyń 10 juldyzynda saǵat 19.00-de «Beıbitshilik jáne kelisim saraıynda» QR Halyq jazýshysy - Farıza Ońǵarsynovanyń
shyǵarmashylyǵyndaǵy «Dalanyń kúıshi Dınasy» pesasy sahnalanyp, qalyń kórermenge usynylmaq. Qoıýshy rejısseri - Nurlan Jumanııazov. Bul týraly Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń baspasóz qyzmeti habarlaıdy.
Shyǵarma - halyq kompozıtory Dına Nurpeıisovanyń ómiri men ónerine arnalǵan. Ónerdiń babyn tapqan ataqty kúıshiler, uly kúıshi Qurmanǵazy men jasóspirim Dına arasyndaǵy alǵashqy tanystyq, shyǵarmashylyq dostyqtary týraly jazylǵan pesada kúı qudireti, óner týyndysynyń ómirge kelý sáti, óner adamynyń jan-dúnıesi, kúı týdyrýdaǵy kúızelis pen shyǵarma shyqqandaǵy shabyt pen baqyttyń býyrqana astasqan asqaq sezimder sýretteledi.
Qurmanǵazydaı aǵasynyń artynan erip, óner qýalaý Dınadaı qazaq qyzyna qıyn soqsa da, kúı qudireti qoldap, qasıetti qara dombyramen ómirin órnekteýi men ónegeli ǵumyryn kórermenge jetkizý qoıylymnyń basty maqsaty.
«Dalanyń kúıshi Dınasy» spektaklinde Qurmanǵazy beınesin - QR eńbek sińirgen qaıratkeri, akter Meıram Qaısanov, Dınany - Aınur Jetpisbaeva somdaıdy.
