Dalada jalańash júgirgen astanalyqtardyń vıdeosy jelini dúrliktirdi
ASTANA. QazAqparat - Facebook áleýmettik jelisinde jalańash júgirip júrgen astanalyqtardyń vıdeosy paıda boldy. Sanaýly mınýttardyń ishinde myńdaǵan kórilim jınaǵan rolık astanalyqtardyń dástúrli júgirisi kezinde túsirilgen, dep habarlaıdy «QazAqparat» HAA tilshisi.
«Shyndyǵynda, munda turǵan eshteńe joq. Qystyń osyndaı sýyǵynda júgirý bizdiń «morjdardyń» dástúri. Biz qysta sýǵa túser aldynda osylaı qyzdyrynyp alamyz. Búgin basqa da jigitter bizben birge ergennen keıin eki shaqyrymdyq ujymdyq júgiriske shyqtyq. Sonymen birge, Feısbýkta tikeleı efır júrgizýge bel baıladyq. Negizi «morjdardyń» vıdeosy men fotosy árdaıym jelige shyǵyp turady. Tamsanatyndar da, tań qalatyndar da barshylyq», - deıdi «QazAqparat» HAA tilshisine post avtory Ásker Pırıev.
Onyń aıtýyna qaraǵanda, «Sergektik» qysqy shomylý klýbynyń áýesqoılary Esildiń jaǵasyna júzdegen jastardy jınaıdy. Al Áskerdiń ózi bolsa 7 jyl boıy izgi dástúrdi jalǵastyryp kele jatqanyn aıtady. Áskermen birge óziniń tórt uly da qystyń aıazyn elemeı, shomylýdy ádetke aınaldyrǵan kórinedi.
«Úlken ulym 16 jasqa toldy. Kishkentaıy beste. Biz búgin birge júgirip shyqtyq ta, sýǵa bir-bir súńgip aldyq. Úıde besinshi ulym bar. Biraq, onyń jasy áli eki jarymda. Jyldyń sońyna qaraı ony da ózge «morj uldarymnyń» qataryna qosyp alýdy oılap júrmin», - deıdi Ásker Pırıev.
