Dala.Camp: Otandyq jylqy etin Japonııa naryǵyna shyǵarý josparlandy
ASTANA. KAZINFORM — 1 mamyr kúni Elorda tórindegi Nazarbaev Ýnıversıtetinen erekshe kerýen jolǵa shyqty. Bul — Dala.Camp ulttyq mal sharýashylyǵy ekspedıtsııasy. Aldaǵy 16 kúnde 40 qatysýshy 14 jol talǵamaıtyn kólikpen Qazaqstannyń 10 oblysyn aralap, 6000 shaqyrymdy eńseredi.
Ekspedıtsııanyń aýqymy tańǵalarlyq. Pavlodardan bastap, Túrkistan men Qyzylordaǵa deıin, Shyǵystyń taýlarynan Arqanyń jazyǵyna deıingi aralyqty qamtıdy. Qatysýshylar fermalardaǵy jumys protsesine aralasady, ıaǵnı reprodýktsııa, jem-shóp daıyndaý, mal bordaqylaý men et óńdeý sekildi salanyń búkil tizbegin ishten zertteıdi.
Eń qyzyǵy, ekspedıtsııa realıtı-shoý men derekti fılm formatynda túsiriledi, demek, kórermender malshynyń tynys-tirshiligi men salanyń túıtkildi máselelerin ekran arqyly kóre alady.
Jobanyń negizin qalaýshy, «Turan» mal ósirýshiler qaýymdastyǵynyń tóraǵasy Jánibek Kenjebaevtyń aıtýynsha, bul sapardyń túpki maqsaty — qazaqstandyq ónimniń eksporttyq áleýetin arttyrý. Ol otandyq jylqy etiniń Japonııa naryǵyna shyǵý múmkindigi týraly mańyzdy jańalyqpen bólisti.
— Maýsym aıynyń sońynda Mitsui korporatsııasymen birge Japonııanyń Kýmamoto qalasyna baryp, qazaqstandyq jylqy etiniń degýstatsııasyn ótkizýdi josparlap otyrmyz. Ol jaqta bizdi iri dıstrıbıýtorlar men ımporttaýshylar kútip otyr. Osydan birneshe jyl buryn japondyq delegatsııa elimizge kelip, etimizdiń dámine joǵary baǵa bergen. Aldaǵy bir-eki jylda Japonııa naryǵyn Qazaqstan úshin ashamyz dep oılaımyn, — dedi Jánibek Kenjebaev.
Bul saparǵa QazTrade men Aýyl sharýashylyǵy mınıstrligi qoldaý kórsetip otyr. Ekspedıtsııa tek tájirıbelik emes, ǵylymı sıpatqa da ıe. Nazarbaev Ýnıversıtetiniń ǵalymdary men bıologtary óndiris protsesindegi tehnologııalyq kedergilerdi anyqtap, sheshý joldaryn usynady.
— Bul — ǵalymdar, fermerler men ınvestorlar arasyndaǵy dıalogtyń jańa formaty. Sapar aıaqtalǵan soń biz ýnıversıtet bazasynda naqty jobalardy birlesip júzege asyramyz, — dep atap ótti NU Impact Foundation basqarýshy dırektory Dına Saıfýtdınova.
Ekspedıtsııa sońynda Turan qaýymdastyǵy Qazaqstandaǵy et baǵytyndaǵy mal sharýashylyǵynyń jaı-kúıi týraly úlken analıtıkalyq esep daıyndaıdy.
Eske sala keteıik, Grýzııada ótken Dala.Camp Georgia halyqaralyq forýmynda Qazaqstan mal sharýashylyǵy ónimderin Grýzııa arqyly halyqaralyq naryqtarǵa shyǵýdy josparǵa alǵanyn jazǵan edik.
